Market Insight：電視機股可炒上落

第二關即美國議息，今晨便有結果，實際上大家都預咗唔會加息，只係睇主席耶倫有乜表示，但耶倫耍太極亦愈來愈叻，相信都不離「不排除下月加息」之類，惟市場反應難料。近期美股患上「英國脫歐恐懼症」，但實際係高處不勝寒，借住消息回吐，三大指數均失守50日線。

回說入摩撻Q事件，連巴基斯坦都搶先中國一步，睇落相當冇「飛士」。不過，阿爺經過舊年救股又救匯之後，其實對於加入國際大家庭之興趣已大不如前，所謂焉知非福，多千零億資金流入亦貢獻不大，寧願繼續關門打狗。

依家要兼顧的事情太多，人仔在岸價首度跌破6.6關口，美國加息如履薄冰，德國十年債亦首見負利率，東海同南海搞到國際關係緊張，淨睇深港通遲遲未拍板，就知阿爺其實唔係太緊張入摩與否。

數字視頻隨時跑出

創業板全配售亂咁炒見得多，數字視頻（08280）上創板公開發售變成罕見，而公司做視頻決方案亦算熱門行業。不過，集團旗下「新奧特」一五年內地電視廣播後期製作市場份額在第二、三位之間，但亦僅佔6.8%，可見競爭相當激烈。排頭位之成都索貝原本計劃去年七月在中國創業板上市，點知遇到A股股災令IPO停頓，變成無從比較。

公司扣除可換股優先股公平值變動影響後，一三及一四年分別淨虧損2,090萬元及5,440萬元人仔，一五年則賺2,640萬元人仔，所以要選擇登陸創業板。公司集資額2.34億至3.38億元，有冇得炒主要睇貨源是否歸邊，六月二十七日上市，睇怕已有足夠投資者「認頭」，加上市況氣氛麻麻，散戶認購意欲低，可能同全配售無大分別。

數字視頻有3個基礎投資者，包括創維數碼（00751）。創維啱啱派去年度成績表，雖然少賺31%，但仍勝過市場預期，股價昨日升一成。公司扣除上年度的一次性收益，經營純利其實上升22.9%，毛利率亦升1.9個百分點至21.9%，所以股東應該滿意。

創維業績勝在平穩

電視機股近年有好多變化，包括受互聯網電視的重大挑戰，但傳統電視銷量仍保持穩定。現時電視機功能已不是睇電視咁簡單，可以上網及成為智能平台，惟競爭者亦愈來愈多。睇歐國盃就見「海信」大賣場邊廣告「中國第一電視品牌」，而TCL多媒體（01070）自夥拍樂視後，近月電視銷量亦有明顯增長。

儘管電視機愈出愈大及愈高視覺效果，但同手機一樣已無大新意，變成消費者減低換機意欲，增長率得單位數字，如何在低增長及高競爭當中殺出血路，將考管理層能耐。創維多年來總算交到功課，尤其去年TCL、康佳及長虹等老對手均見業績大倒退。

創維往績PE有7倍幾，雖然唔算貴，未來增長或不過不失，估計都係值咁上下估值，難望有好大上升空間，最好都係炒上落。

古勝