絲絲講場:艾博賢開檔 明鬥LME

倫敦金屬交易所(LME)前行政總裁艾博賢(Martin Abbott)一二年中一手促成將LME以「天價」賣畀港交所(00388),一年多後收到大筆獎勵金額後「閃電」離場。近日艾博賢再有動作,有外媒報道,佢有意另起爐灶,正商討喺倫敦建立另一個可以取代LME嘅電子交易平台,擺明與LME「打對台」,初步更已取得幾個LME現成會員嘅支持。

低收費直攻對手死穴

對手來勢洶洶,港交所點睇呢單嘢?曾出任LME自營結算所LME Clear行政總裁、現任港交所集團營運總裁冼博能就回應,「祝佢好運!」,因為營運相關平台需要很多投資,而且市場亦充滿挑戰性!

LME自從被港交所買起後,實施商業化計劃,交易成本增加已引起部分LME會員不滿。聽講艾博賢嘅新平台重點將會係以低收費做招徠,直攻LME「死穴」,並提供電子同電話交易渠道。

余絲韻