又到暑期實習旺季，想入投行做Intern（實習生）學做大鱷？但份工無限工時，之前仲有Junior Banker做到死咗，嚇走唔少新鮮人。不過，高盛今個暑期有超過25萬位大學生應徵做Intern，同二○一二年比多咗40%！
投行吃香番？首先係經濟唔好，投行少咗，想入行就要爭；仲有投行文化有變，無以前咁Chur，為留住人才，開始學科企講「健康、快樂」工作模式。
行情點？高盛舊年有約22萬人應徵Intern同分析員，結果請咗9,700人。摩通同花旗每年只會請應徵者中嘅2%，美銀美林就會請3%，德銀舊年就請咗9%。
想入金融界，又唔想冇咗條命仔？絲絲醒你5招求生。其實呢5招，何止投行，邊度都啱。
1.一早主動搵嘢做
點解晚晚都OT？皆因上司臨收工先落Order。解救方法係，自己一早主動搵嘢做，臨收工時你仲忙緊，啲Order自然去咗啲「閒人」度。
2.善用公司工具
好多大行網站本身配備咗好多工具，方便整靚個PowerPoint同Chart，用得唔好嘥。
3.分緩急輕重
做Intern，人人都可以叫你做嘢。所以一收Order要問幾時Deadline，仲要估邊個老細會追得急啲。
4.做咗啲Excel嘢先
投行為「保護」Intern，規定佢哋準時放工。做唔晒嘢又「被放工」點算？記得喺Office先做好啲Excel嘢，其他帶番屋企再做。
5.做得快唔係好世界
唔係快就得，做錯晒會整花自己個底，所以記得要Double-Check清楚，咪只貪快。
余絲韻