絲絲講場：中銀出百年紀念鈔 等炒！
又有得炒紀念鈔喇！中銀香港（02388）出年踏入100周年，副董事長兼總裁岳毅預告會發行紀念鈔慶祝，岳總尋日話已獲相關部門批准，而且版面設計已敲定，仲好有信心咁話「一定不比某些銀行差，一定較其他銀行好」。
單張料炒上600蚊
絲絲即刻問錢幣專家陳榮輝，佢話中銀香港同內地淵源深厚，相信會吸引唔少內地炒家，估單張炒價可上到600元！
呢個「利好」消息令紀念鈔市場變得活躍。渣打150周年紀念鈔，依家升番去1,700元。舊年嘅滙豐150周年紀念鈔，單張同三連張炒價仲有水位，但35連張就……絲絲唔想提（自己睇表吧），留紀念算吧。
派餅卡小股東嫌少
講開中銀香港，佢哋尋日股東會派餅卡！股東會喺君悅酒店開，絲絲見條小股東人龍排到出酒店門口。但啲小股東呢頭嚟、轉頭就走，純粹嚟拎張餅咭。
今年每人拎到兩張餅咭，但有位婆婆唔滿意，話舊年攞到六張，點解今年得兩張，佢認為持股愈多可拎多幾張。見啲職員喺大堂被婆婆責難「都唔知識唔識做嘢」，絲絲覺得陰功豬囉。
余絲韻