北水頭等倉：蒙牛尚未確認轉勢
昨日市場焦點盡在本地銀行裁員事件，雖然預示未來經營環境轉趨嚴峻，但見港股未受太大影響，恒指升98點收市，報20,859點，國指亦升48點，收報8,756點。不過，大市成交回復舊觀，僅579億元，呢期靠魚缸搵食，真係度日如年！
重慶鋼鐵A股（601005.SH）昨日停牌，披露指重慶市國有資產監管理委員會正研究涉及公司的重大事項，鑑於該事項存在重大不確定性，故A股停牌，惟H股（01053）照常交易，在憧憬注資及重組之下，重鋼股價昨日急升27%，收報1.43元。
致力提升毛利率
雖然算係益咗香港市場可以炒轉消息，但同一公司，兩地掛牌，同一件事，一邊停牌一邊交易，到底是甚麼標準，真的令人費解。
聯想集團（00992）股價因Google悉售持股的消息而被質至四年多新低，昨日收報4.56元，跌4%。Google手貨其實預佢遲早會沽，如今反而明朗化，照計可以小注睇位博吓反彈，首站先睇5元關，穿4.2元止蝕。
昨日另一異動股乃蒙牛乳業（02319），股價一度高見13.58元，收報13.56元，升6.27%，成交2.24億元。事緣聽聞蒙牛近日在上海迪士尼搞咗個投資者日，參觀公司在樂園的雪糕店，而德銀亦發表報告，話此舉有助蒙牛品牌建立及產品升級，毛利率擴張有助推動盈利增長，故維持買入建議，目標價睇14.1元。
走勢上，首季蒙牛股價成功考驗10元關承接，之後反覆回升。短線操作，是浪主要阻力在14至14.5元區域，若能以大成交突破，才可看高一線，重要支持在12.5元。
司慕渢