Market Insight：乳品股有回勇迹象

個市成交咁奀，居然愈升愈有，在在反映唔少投資者在今浪得個睇字。客觀環境，不少人既怕聯儲局突然在六、七月加息，亦驚月中英國脫歐公投，更甚者，不少說法擔心年底美國總統選舉，真係會選到狂人特朗普，可能引發較諸金融海嘯更大的危機，就連被譽為地球上最聰明，並證明黑洞輻射的科學家霍金，都話無辦法理解特朗普點解可以初選廣受歡迎，何況我等凡夫俗子。

近日民調顯示，英國民眾支持脫英比例再度超越留英，對於憂慮英國脫歐壓力下，歐盟團結進一步土崩瓦解的悲觀派，如同見到「死亡交叉」出現一樣。美國民調顯示，特朗普的支持度亦都開始緊貼希拉妮，莫非今年兩個足以影響金融市場的重量級核彈，會雙雙爆發？

莊家開盤透露玄機

先由結論講，古勝是市場效率假說的信徒，預期可能發生的危機，往往唔係真正危機，船頭驚鬼，船尾又驚賊，只會注定在五月破紀錄沽空比率之後的挾淡浪，得番個吉。尤其民調絕對不宜過信，若非善忘，一四年蘇格蘭的脫英公投，事先一樣以為五五波，但人類有害怕轉變天性，最後留英派票數贏足幾條街，脫英危機大步檻過。

若然仲係驚，可睇番賭真金白銀的英美博彩公司莊家開盤，英國留歐同希拉妮入主白官，賠率持續熱到透（1.3至1.4倍），根本無受民調消息影響。

假如真係要等塵埃落定，六月中美國唔加息，英國唔脫歐至追，個市恐怕都已經係時候掉轉頭炒。

騰訊（00700）股價周初創新高，唔少人以為基金大戶見個市無古仔，吼番新經濟概念股。惟隨後相關消息證明騰訊真係好個別例子，根本同成個sector被睇好關係唔大，尤其見到兩隻被視為中國軟、硬件市場龍頭企公司，阿里巴巴及聯想集團（00992）飽受外資股東出貨之苦，可見一二。

兩科技巨擘表晒態

同國際打假聯盟鬧得不愉快，光棍節銷售又正被調查，四面楚歌的阿里巴巴主帥馬雲，恐怕又係時候企出嚟呻後悔去美國上市。日本軟庫沽阿里套現79億美元，持股量只係由32.2%降至28%，再減磅的陰霾下，睇怕好難炒。

另一邊廂，Google將Moto手機生意賣畀聯想之後，都唔理股價貼住三年低，一鋪隊清，將尾貨3.71億股批晒出街。

咁啱早兩日，在下先同聯想的死硬派粉絲爭拗隻股短期得唔得，粉絲認為啱啱做完「超額撥備」，跟住業績點都有得彈吓，但睇見11元樓上接貨番嚟的Google都唔等，以三分一價錢大平賣，三月另一「以物易物」的股東IBM，一樣清佢倉，聯想得唔得，在下唔識睇，但兩巨擘都唔睇好，就真係雞食放光蟲，大家心知肚明。

內地乳製品安全出現信心危機後，消費者自然轉向進口品牌，需求有增無減，據統計，今年首季中國進口奶粉同比增加25%。來自新西蘭、澳洲等品牌一向都較受歡迎，而近年南韓品牌因庫存增加，亦加快部署進入中國市場。

奶粉行業競爭愈來愈激烈，本土品牌點樣加強實力應對尤為重要。早前有內媒報道，嬰幼兒配方奶粉產品註冊制今年將出台，時間表同相關詳情要等政策真正出台先知，惟從表面睇，加快汰弱留強速度及加強監管，對行業而言都係件好事。

合生元中線仍看好

昨日乳品股亦普遍做好，蒙牛乳業（02319）升6.2%，收報13.56元。德銀發表報告，認為集團與迪士尼的合作有利品牌建立及產品升級，而毛利率擴張預計會成為推動其盈利的主要動力，維持「買入」評級，目標價睇14.1元。至於合生元（01112）及雅士利國際（01230），分別升3.2%及1.7%。

合生元首季業績中，嬰幼兒營養及護理用品收入按年跌12.8%，但成人營養及護理用品收入卻按年升48.8%，兩者形成頗大對比，顯示集團去年收購的澳洲保健品龍頭Swisse，對集團貢獻唔少，未來新業務有望成為增長動力。

該股上月中跌至20.25元後，呈雙底回升，昨日突破咗50日線24.3元阻力，守穩其上，中線目標挑戰28至30元。

古勝