絲絲講場：郭思治做埋德普科技「明燈」
講起驟忌，股民怕個「熊」字，股評人斷估最忌個「燈」字，佢哋至怕畀人叫做「明燈」。尋日德普科技（03823）開記招公布同內地物業管理公司合作項目，仲請咗股評人郭思治嚟撐場。咦，德普賣燈，燈股嚟嘅喎！今次真鬼馬。
不過，耀才證券市務總監郭思治郭Sir見慣大場面，睇嚟應該百無禁忌。郭Sir尋日自爆屋企都換晒德普嘅LED燈，不過究竟慳幾多電就唔知喇，皆因所有家頭細務都交畀老婆打理咁話。郭Sir佢哋講得幾咁生動鬼馬，有如Talk Show，仲不經意咁放閃，搞到絲絲幾乎想戴番副黑超添。
余絲韻