絲絲講場：咩係「市調機制」 請睇片
港交所（00388）嘅市調機制（VCM）八月殺到，當股票短時間劇烈波動，將引入冷靜期。為怕老散唔明，港交所特登拍咗條短片，用通俗手法演繹，尋日就舉行「首映禮」。來，去片。
主角係一對男女揸住架紅色跑車遊車河，當飛緊車之際，突然要佢哋慢駛，點解嘅？呢個時候，男主角突然港交所發言人上身咁，解釋VCM。
原來，當股份相對5分鐘前嘅最後交易價變幅超過10%，就會觸發VCM，要啟動5分鐘冷靜期。男女主角就係因為之前開得太快，所以就有個指示牌叫佢哋限速5分鐘。嗱記住，只係慢駛咋，唔係停車o架，事關VCM唔係停市或停牌，仍可在指定價格限制範圍內進行買賣。冷靜過後，男主角就可以正常咁開番車喇。
男主角仲話，VCM好似日出同日落，每日只出現上、下午各一次。女主角聽完晒就話好明，大讚男友叻叻豬。喂，咁你又明唔明VCM呢？
余絲韻