北水頭等倉：京能潔能順勢跟進

昨日話要關注AH股，提及的洛陽鉬業（03993）曾高見1.63元，見港股通御用經紀號6999買賣活躍。事緣昨日洛鉬A股（603993.SH）股價漲停，睇嚟收購剛果銅鈷礦單大刁喺內地甚矚目，見AH差價咁大，有同胞南來掃貨。睇走勢，短線穿得上周高位1.68元，目標維持向1.8至2元阻力區推進。

風電股突圍而出

板塊消息方面，昨日傳來中彩在線高層在內地助查，行內人聽到呢個消息都幾震撼。不過，亦可能意味為時逾年的網彩調查及整頓已近尾聲。

另一較矚目板塊消息，乃有指發改委保障風電及太陽能發電時數，帶動新能源股做好，大唐新能源（01798）升近一成，龍源電力（00916）、華能新能源（00958）升幅介乎5至7%。

呢個板塊都算靜咗好耐，難得有政策傳聞帶動炒一轉。只是，昨日升勢成交雖有增加，但未足以成大氣候，短炒還是要見好識收，等釐清政策消息再作較長線部署。

講到新能源股，見到京能潔能（00579）最近頻獲中再保集團增持，持股量已由五月十八日首次披露超過5%，至最近一次增持（五月二十四日）持股量已增至7.17%，到底搞邊科，不妨等着瞧。

早前京能管理層提到，控股股東未來或將珠三角三個合共裝機容量約兩千兆瓦的燃氣發電項目注入公司。雖然項目回報率一般，但總算有助擴大資產，提供穩定收入。乘板塊氣氛升溫，京能股價昨日收報2.49元，剛好係50日線所在，且看呢轉能否挑戰2.6至2.8元阻力位，失守2.4元止蝕。

司慕渢