絲絲講場：散戶太悲觀6成做塘邊鶴
港股舊年上半年表現可以用「如日中天」嚟形容，幾乎人人都感受到中港大牛市威力；不過一到下半年，股市就開始跌。嚟到今年，雖然未至於「貼地」，但對股民嚟講，絕對係一個天、一個地。
康宏（01019）調查發現，有近六成嘅人覺得今年唔係入市時機，當中有約四成嘅人估個市會繼續差落去，唔想蝕錢所以唔入市。整體嚟講，有三成人覺得今年投資會輸錢收場，平均估計會蝕兩成。
舊年係天堂 輸都唔願走
對比番舊年個調查，當時可謂「全民皆股」，有超過八成人話有投資股票，仲有大部分人預期全年賺到五成回報！依家睇番真係天方夜譚。當時鑊氣幾咁熱，股民大無畏精神全表現，當時有四成幾人話就算投資損手，輸四個月人工都可以接受到，仲有近五成人話就算蝕錢都唔打算離場。
究竟有咩原因可以令大家去到咁盡？當時調查就話，港人最想實現嘅人生目標就係買樓。不過，叫得做人生目標嘅，照計唔會年年轉啩。點都好，入市定唔入市，都總搵到個理由，至於真係理由定係藉口，自己都未必知。
余絲韻