絲絲講場:恒生女將多首超男高層

睇住恒生(00011)856呢個數字,終於畀絲絲見番啲啲鼓舞。

856係乜?是咁的,恒生話咁多年非行政人員入面,女性都大約佔六成,原來去到舊年年底,女性行政人員人數仲首次超越男性,按年升兩成,去到856人,男性行政人員則為843人。

關穎嫺周丹玲上位

恒生近兩任掌舵人梁高美懿同李慧敏,都係女大班已經係銀行界佳話,一班近年上位嘅Top Team(高級管理層),包括七月即將上任零售銀行及財富管理業務主管嘅關穎嫺(Margaret)、司庫周丹玲(Liz)、商務理財業務總監袁妙齡(Wendy)同投資產品及顧問業務主管李佩珊(Rosita)等,都係恒生招牌女將。

產假加兩周 侍產多5日

恒生證明到上位唔會睇性別做篩選,亦照顧到女士需要,決定將產假日子睇齊阿媽滙豐控股(00005),今年五月起將產假由12周增至14周。就連男士侍產假亦由5天增加至10天,不過男士侍產假似乎就同滙控嘅兩個星期,仲有少少距離。

絲絲隔籬枱位公子話,香港男女平等都算世界前列,連大型銀行管理層都出現平分秋色嘅天下。真係已經平等?絲絲唔敢講。

余絲韻