繼官媒轉載權威人士評論經濟後，又傳來最高領導人主持中央全面深化改革領導小組會議時強調，改革有陣痛，但不改革就是長痛。顯見今回供給側結構性改革係動真格，唔會再瞻前顧後，大家要做好經濟出現「陣痛」的心理準備。
恒指上周五高收，但未能收復兩萬點關，若然恒指要完全回補三月初的上升裂口，短線觀望19,400點水平支持。睇A股都係唔生唔死冇運行，港股真係愈嚟愈難搵食，呢個時候搵目標，都要着眼中長線，短炒可免則免。
上周初股價反覆向下的華潤電力（00836），到上周五終現反彈，主要係大行瑞銀唱好。但經濟不景下，電力需求備受影響，中資電力股的行業展望趨審慎。
三隻中資電訊股最新營運數據，其中聯通（00762）上月4G上客淨增長438萬戶，按月大致持平。其實，今年聯通業績仍處低潮，股價已一定程度作出反映，相信最快要到第三季才有機會見轉機。
依股價走勢，年初至今主要阻力位仍在10元關，而低位支持則在7.8至8元區域。想博第三季營運數據有改善，短期不妨先以靜制動，等候再試7.8至8元的支持區，再考慮分注作中長線部署。
司慕渢