絲絲講場：銀聯高層40幾張卡傍身

需要到咁多張信用卡嚟傍身，當然唔係普通人，佢就係銀聯國際香港分公司嘅揸Fit人，日日袋住40幾張信用卡，都係為咗「做好呢份工」咁啫。

應酬銀行巨頭免尷尬

做得銀聯高層，好多時要邀請各大銀行巨頭應酬Social吓，同個銀行客杯酒言歡後，埋單時若果攞第二間銀行嘅銀聯卡出嚟，幾咁尷尬！

收藏背包內 排列有序

所以，呢位揸Fit人個背包日日袋定40幾張唔同銀行嘅銀聯卡，仲排得整齊有序。每次應酬前，佢都會小心選取啱用嗰幾張，直接放入銀包等待出動。

既然可以預先選取，何解仲要日日袋齊40幾張卡？有得解，事關一日24小時，你點知邊分鐘會突然碰到阿邊位客。嗰40幾張卡，就代表住銀聯與銀行嘅良好合作關係，每一張都唔講得笑。話時話，40幾張信用卡唔知有幾重呢可。

余絲韻