你畀份工Chur爆咗未？尋日數咗10大徵兆，絲絲今日醒番6劑解藥你，等你由工作找回靈魂，至於做唔做得番自己，就……
要識公餘時間「絕緣」，千萬不能一周七日廿四小時無間斷只得工作同瞓。今時今日，周末放假要完全唔理工作係天方夜譚，但至少喺特定時間內唔好理電郵、WhatsApp、WeChat等，只陪家人。初時可能好難，但持之以恒一定見效。
留意有冇經常頭痛、胃痛、頸痛，好多時都係壓力及緊張造成，往往係大病先兆。命仔先至緊要。
每日工作期間最少抽15至30分鐘放鬆吓：食吓朱古力，飲少啲咖啡，鬆弛神經，做啲自己覺得可以減壓嘅嘢。
唔好以為安眠藥可解決失眠，同醉酒差不多，會損害記憶力，形成惡性循環，加速衰老。你要令大腦自然作息，否則連個腦都Chur爆埋。
有時未必係畀份工Chur爆，而係自己安排不當，搞到成日得個「忙」字。諗諗有冇更好辦法，或者搵人傾，借人家經驗解決問題，唔好自己鑽牛角尖。
搵班朋友做「人肉叉電器」，得閒一齊吹水、去吓旅行，盡情丟掉煩惱。錢乃身外物，親情及情誼先係無價。
余絲韻