紐約大都會藝術博物館啱啱搞咗個被譽為「時尚界奧斯卡」慈善舞會，名為「Met Gala」！

咁大型嘅盛會，又點少得行紅地氈？猛人梗係要花心思裝身，而今年仲以「人類遇到機器」（Manus X Machina）為主題，搞科技嘅大佬仲唔係鏡頭嘅焦點？

今年好多硅谷大佬都有參加，包括美國蘋果公司（Apple Inc.）行政總裁庫克和首席設計總監艾維、Uber行政總裁卡蘭尼克同Google始創人之一布林、Instagram CEO斯特羅姆等等！

而出奇嘅係，一向High Profile嘅雅虎行政總裁邁耶就一改作風，喺舞會上刻意迴避鏡頭。絲絲掃勻成個網絡，竟然搵唔到佢嘅身影！

估計應該係因為呢排盛傳邁耶就快被人炒，同時雅虎又畀股東逼賣盤。好多投資者都估雅虎最終會出售搜尋器、電郵等業務。咁多嘢要交代，佢仲點可以唔見光就閃？

絲絲仲記得，佢上年同一個場合，着上佢嘅御用美國設計師Oscar de la Renta為佢設計嘅紅色長裙亮相，艷壓全場嘅一幕！昔日嘅光彩，可能要等轉工再見喇！講番個舞會，衣着夠奇特嘅，真係唔可以唔提美國著名歌手Will.i.am，佢載人工智能鏡蒙住大半塊面。諗諗，邁耶都學佢，咁就可以低調地高調！

余絲韻