講咗好耐嘅《憤怒鳥》大電影終於嚟喇！係，大家可能已經好少玩呢隻風靡一時嘅手機遊戲，正因為咁，芬蘭開發商Rovio大搞噱頭，電影謝幕時播出條碼，入場觀眾只要拎出手機拍攝，就可以開啟獨有關卡。
《憤怒鳥》大電影將於五月二十日喺美國上畫，而上述條碼可以用嚟開啟最新推出嘅系列遊戲《Angry Birds Action！》獨有關卡。Rovio方面話：「做法係希望延續故事，好多人睇完電影之後就會抽離，但我哋希望觀眾抽離只係因為想玩遊戲。」
公司喺唔同嘅《憤怒鳥》商品同宣傳產品上加上條碼，掃描條碼就可以解鎖新遊戲入面嘅「升呢」工具、小遊戲同動畫片段，聽聞有超過24個條碼，要集齊整套都唔易。
余絲韻