阿里壇主馬雲本洋文傳記今個月十二日啱啱出，喺Amazon定價17.96美元（約140港元）。兩星期都未夠，就已經有老翻Download，盛惠4蚊人仔有找。老翻喺邊度賣？淘寶囉！
話咁快，今次啲老翻周一就被淘寶下架！作者Duncan Clark仲喺Twitter多謝阿里咁快「做嘢」，順便同讀者講中文版即將面世。Clark同馬雲好熟？唔知呢，不過佢喺內地生活咗廿年，仲搞埋投資顧問公司幫啲超級內企集資，好熟內地市場。
仲記得馬雲上個月先話「消滅阿里易，消滅假貨難」，難？佢謙啫，睇今次幾快手。