絲絲講場：上商搞副業 總部變名店

地舖租畀Versace開旗艦

就好似上海商業銀行咁，佢哋中環皇后大道中12號幢上海商業銀行大廈（即是上商總行）重建完，依家將地下同一樓租畀意大利名牌時裝Versace開亞洲旗艦店，總面積12,600平方呎，會係亞洲最大。

幾錢租？人家簽咗保密協議，唔講得。不過預計幢總行大樓今年會有成2,000萬元租金收入，去到二○二○年租金收入會佔總收入7%！絕對唔係小嘢。

啲租金收入，當然唔止嚟自Versace一個租戶。上商總行樓面面積達14萬平方呎，除咗留番6.8萬平方呎面作銀行總部自用外，其餘樓層全部出租，仲已經全數獲承租，平均呎租約106元。

銀行寧可自己縮上樓，都要將啲靚位出租賺番筆，近年似乎已成Trend。好似恒生（00011）舊年就將彌敦道十字路口個超級地舖租畀周大福（01929），自己銀行業務寧願搬上二樓。計絲絲話，對於股東嚟講，最緊要幫銀行賺到錢，咩叫「主」咩叫「副」，有乜所謂。

余絲韻