孖妹S檔案：當大鱷迷上股神
股神巴菲特嘅投資旗艦巴郡（BRK）將會喺周六舉行一年一度嘅股東大會（Annual Shareholders Meeting, ASM），孖妹今年無緣飛去美國奧馬哈（Omaha）一睹佢嘅風采。但我哋知道有位叫馬修斯（Jeff Matthews）嘅對沖基金經理，曾多次參與巴郡股東大會，出過三本講巴菲特嘅書，要了解股神嘅投資絕密，唔使一定飛去美國，搵呢位巴菲特「粉絲」傾吓都得啦！
Jeff：Ram Partners合夥人 馬修斯（Jeff Matthews）
巴郡唔值得擁有！？
彩兒：你出過三本書，第一本講你去巴郡股東會嘅見聞，第二本探討邊個會承繼巴菲特，最新出嗰本就分析佢嘅投資策略，真係要叫你一聲巴郡「達人」呀。
Kitty：我聽聞你冇幾耐之前沽晒巴郡嘅持股喎，唔通你做咗咁多研究之後，發覺股神風光不再？
Jeff：巴郡嘅發展有三個階段，最初佢似係一個互惠基金，巴菲特經營得好好。不過，當資金規模大咗，呢個模式唔會做得長久，反而要以平價買啲好嘅業務返嚟，例如See's Candies呢類公司，然後長揸落去。由於有大量現金，巴郡需要不斷做收購去維持公司增長，當市況好嘅時候，企業嘅股價自然貴，事實上，巴郡過去幾宗收購都係以高價進行。佢上年以370億美金收購飛機零件製造商Precision Castparts，我覺得係瘋狂嘅決定。巴郡以往去買平股，依家就用高價做收購。呢個已經唔係我哋以往認識嘅巴郡，佢依家係一個大集團，係一個安全嘅投資，但增長會較慢，令我認為唔值得持有。
留意芒格+收購+承繼
彩兒：巴郡嘅股東大會將會喺網上同步直播，一諗起坐定定喺屋企都睇到就興奮喇，究竟有咩值得重點睇實（口架）？
Jeff：巴郡股東大會嘅重頭戲當然係同副主席芒格（Charlie Munger）以及主席巴菲特嘅問答環節啦，當中嘅一大重點應該係巴郡嘅承繼問題，即係邊個會接替巴菲特嘅職位。另外，就係佢哋點回應收購Precision Castparts嘅決定。呢項收購係繼買入鐵路公司BNSF Railway之後涉資最大嘅交易，令巴郡變咗工業集團，我相信呢樣嘢會引人詢問佢哋依家嘅收購策略。我希望聽到芒格同巴菲特講關於對呢間公司長遠有咩預期。
Kitty：如果巴菲特宣布退休，對巴郡會有咩影響？
Jeff：我諗短期影響不大，因交棒方面嘅計劃做得好好，依家巴郡有好多人才，好似負責保險業務嘅Aijit Jain同能源業務嘅Greg Abel，相比起六、七年前，巴郡已經冇咁依賴巴菲特。不過，所有嘢都有倒下嘅一日，冇咗一個咁強嘅領袖，巴郡嘅成功係好難維持。
彩兒：其實巴郡股東會有咩吸引到你去咁多次呢？
Jeff：我覺得睇住巴菲特同芒格喺台上嘅互動好有趣，過程中可以睇到巴菲特有幾重視芒格嘅意見。當芒格講咗啲稍為有爭議性嘅嘢，巴菲特會想即刻了解多啲，從中可以睇到佢兩個嘅關係有幾密切。你會感覺到巴郡唔係淨係靠巴菲特一人之力建立，係佢哋一齊努力嘅成果。
彩兒：呢啲咪男人嘅浪漫囉。
Jeff：仲有呀，股東會期間，巴郡旗下嘅公司會喺展覽場地展出自己嘅產品，同相關嘅經理溝通，就會知道巴郡唔同私募基金，只注重短線嘅盈利，相反真係可以幫到啲公司長遠嘅發展。
Kitty：咁多嘢好研究，你又會偏偏揀中巴菲特嘅？
Jeff：我第一次聽巴菲特呢個名係喺三十年前，嗰時我喺一間資產管理公司度做。嗰時人人都估油價會大升，話要買油股，會受油價上升拖累嘅消費股就冇人吼，但巴菲特偏偏喺嗰個時候大手買入食品公司General Foods。結果之後油價大瀉，General Foods仲被人收購，令巴菲特大賺一筆。我覺得佢好醒，應該去了解佢做緊啲咩，所以就開始細讀佢每年致股東的信。
啟發搵好業務投資
彩兒：你咁仔細研究巴菲特，吸埋唔少投資智慧啦。
Jeff：我首先學到嘅係要對自己嘅投資決定有信心，由自己熟悉嘅範籌做起，未花好多時間研究一樣嘢前，我係唔會投資落去。佢仲啟發到我點去搵好嘅業務嚟投資，比如重視公司嘅現金流、毛利率等。不過同巴菲特唔同，我係會做沽空去對沖風險，咁會令我安心啲，相反巴郡規模咁大，業務分散，又多現金，唔需要啦。
Kitty：根據巴菲特最新嗰篇致股東的信，喺佢嘅管理之下，巴郡嘅每股帳面價值喺過去51年，由19美元升到155,501美元，相等於平均每年有19.2%嘅複式增長，大幅拋離標普500指數嘅9.7%，真係神級嘅回報呀。未來會唔會有邊個可媲美佢呢？
Jeff：巴菲特開始投資嘅時候正值經濟蕭條之後，當時好多資產都好平，但依家啲嘢咁貴，投資好難贏得多。仲有佢個往績有成50年，當中只有幾年佢係跑輸大市，邊有人咁易學到呀。
若有料報畀彩兒同Kitty或有嘢問，可電郵money.biz@on.cc
Kitty 彩兒