Market Insight：華晨前景值得憧憬

講番轉頭，三月阿爺出盡力想推高A股，如降孖展利率，對死灰復燃的股票配資又抱隻眼開隻眼閉的態度，有形之手想為A股炮製「政策牛2.0」，可謂畫公仔畫到出腸。加埋近排宏觀經濟數據，大有冬去春來之勢，第一季GDP好過期，PPI亦低位拗腰，勢估唔到A股唔領情不特止，上周中更跌穿埋3,000點心理關口。

股市最棹忌係好消息唔肯升，事實上，今浪國指表現一直比「紅色素」相對低的恒指差勁，上周五國指已退守10日線水平，反之恒指全日最低點，都仲距離10日線21,168點至少有190點距離，國指弱於恒指甚是明顯。

大鱷言論不容忽視

考慮埋上周中，深港通六、七月拍板的傳聞甚囂塵上，卻未對中字派股價起半點漣漪。近排唔少大行報告，都提及內地債務違約將進入高峰的風險因素，估算牽連數額可能達到7,000億至8,000億元人仔。

大行分析員無趁宏觀數據轉勢，改口風賣橋畀基金客，說服佢哋去執平貨，反而繼續short China的古仔，所以索羅斯預言中國信貸市場爆煲，老實講，論調唔算新鮮，但出自一個一生在金融市場戰績輝煌，經已退休在金融圈享盡光環，今年八十有五的老人家，既然佢都唔怕睇錯市臨尾香，咁高調的唱淡中國，你信唔信好，多多少少都值得大家參考吓。

今日北京車展開幕，又睇睇有咩可以應吓市。內地車迷自然聚焦在新能源車款及相關的零科技產業，可惜今年內地新能源車呃補貼情況漸趨嚴重，中央研究削補貼撥亂反正的傳聞，唔似是無的放矢。

故此，投資焦點都係留意番新車款推出，例如吉汽（00175）帝豪系統的GS，以及踏入第二、三季各大車廠的降價搶客情況到底有幾進取。

車款進入更新周期

華晨汽車（01114）的合營華晨寶馬早排公布的三月銷售，按年升11.9%，扭轉先前兩個月的跌勢，被視為去庫存完成得八八九九的徵兆。今次車展公司會推出華晨寶馬新X1，車款及配置更新，應有助下半年在SUV市場重佔一席位。

至於中長線，明年開始的三年，會按年推新5系、X3及新3系，全線車款進入更新周期，對長期增長動力應有相當幫助。

估值方面，華晨市盈率區間由一一年開始持續下降，由高峰的22倍至最低見過7.4倍，現價一六年市盈率只是9.3倍，處於周期的下游水平，在產品進入更新周期，華晨睇落短炒與長揸都有故事支持。二月中見6.06元低後，股價都幾Chok，但離唔開級級上形態，看來已經有資金密密透過短暫的震倉收緊貨。

上周產油國在多哈舉行的會議未能達成凍產協議，紐約期油一度跌穿38美元水平，不過好快又收復失地，現時又重上43美元。另外，有傳油國下月會再開會，但俄羅斯石油部長就指暫時未有開會的安排。何時能夠達成協議仍是未知之數，即使下月會議開得成，實質成效亦存疑。

油企利好因素欠奉

國際油價下跌，油企業績首當其衝，中海油（00883）、中石油（00857）及中石化（00386）去年純利分別倒退66%、67%及30%。油價由去年下半年開始反覆向下，今年二月跌至26美元水平才見底回升，油企首季、甚至上半年的數據預計唔會有太大改善。

雖然油價已由低位反彈超過五成，但全球需求未見明顯復甦，根本問題未有改善，難以令油價再大幅上升，故「三桶油」前景仍未明朗。

古勝