講完打工皇帝，絲絲加餸。唔止想保飯碗，直頭係成碗叉燒飯兼加隻荷包蛋添！以下扭人工19竅門，幫大家斟高啲人工番嚟。
為免嗌價過高或過低，先要知市價。邊度睇？有啲搵工網會有不同行業薪酬水平，政府統計處亦有。
諗定自己底線係要加幾多。討價還價前，必須心中有個價。
見工時，肯定人家請你先好講人工。如果人家一開波就問，不妨答「不如等你哋睇吓我是否合適人選先吖」。
傾人工可以興奮，但唔好太「渴」。
講錢之前，先吹水講吓屋企、興趣，等對方放低戒心，傾落去順攤啲。
見工時，唔好自爆現時人工。若對方問到，你可以禮貌話唔方便講，順便打蛇隨棍上講自己想要幾多錢。謹記，若每次轉工，都只係喺舊人工上加啲啲，咁要轉工轉到幾時，先有似樣嘅人工？
要畀對方知道你幾有料，唔好怕醜，一定要Hard Sell自己有幾得。見工嘅，唔單止要晒「沙紙」、推薦信，仲要吹下自己喺舊公司嘅「偉績」。
有力嘅理由，一個夠，頂多兩個。專家話，理由再多就冇力，兼畀人覺得你冇自信。
傳統智慧係等人開價先，但專家話，其實先開價有着數，可以預先鎖實個價位水平。
談判嗰時，最好要強調自己可以為公司帶嚟咩同幾多好處，而唔係講冇咗你有乜損失。
開價時畀個價錢範圍，唔好開實數。一來畀人覺得你有得傾，二來留個走棧位畀自己。
若真係要開個實價，不妨開個岩巉數，例如$18,500好過齊頭$20,000。心理學研究顯示，個數岩巉更易鎖實個價位，兼令人覺得你做足Research。
講價時，唔好玩手指、翹手、「Un」腳；唔好只坐櫈邊，咁會顯得你太進取。幾緊張都要保持腰板挺直同眼神接觸。
研究話，談判時模仿對方表情、語氣、身體語言，會易啲傾得掂。
一緊張就不斷講，驚死會Dead Air？其實講得愈少，對方就愈會過料畀你。
對方還價後，你頂多還多一口價。再多，會畀人嫌煩嫌太進取，得不償失。
如果要求人工失敗，可以試轉戰爭取員工福利，甚至試吓要求半年後再Review機會，用時間證明自己能力。
對方還價後，唔好即覆，畀時間自己冷靜，諗清楚接唔接受個Offer，甚至問吓家人朋友點睇。
傾唔掂，唔使頹，可能只係時機唔啱，未必係你個人問題，下次再嚟。
余絲韻