孖妹Ｓ檔案：秘製指南 藏「股」法

金字塔式投資法：着重溝貨 分散風險

彩兒：（懶係科幻Mode）究竟……金字塔式投資法係咪來自古埃及o架呢，同木乃伊、《盜墓迷城》有冇關係呢？

胡：彩兒，咪咁多幻想啦……我○七年就開始用呢種投資法至今，數數手指已經九年，買入股票或衍生產品時十居其九都會用，出貨時間中都會用。

財經書作家胡李察稱，○七年開始用金字塔式投資法。	中國銀河金曹稱，海龜投資法精粹是趨勢交易。	利時神婆潘秋婷表示，參考星座做投資，主要看星座性格及運勢。

胡：其實金字塔式買入法算係分注買入法嘅一種，應用時先決條件，係確信股份處於一浪高於一浪嘅狀態，堅守「溝上唔溝落」嘅心法做部署，由於股份係飆升緊，分注買就可以分散一注高追嘅風險，價低買多啲，價高就買少啲。大可將注碼分10份（或10手），首注用十分之一資金（或買1手）、第二注用十分之二資金（或買2手）、第三注用十分之三（或買3手）、第四注用十分之四（或買4手），如此類推加碼，如果係入場費較低嘅衍生工具產品，以手數為量化方法，就可以將「1、2、3、4」嘅心法以幾何級提升，例如以「1、4、9、16」手入市。

Kitty：出貨又用同樣方法？

胡：我會用倒金字塔式賣出法，或者係一次過賣出。法則實行方法係先賣出十分之四持股（或賣4手）、其後賣出十分之三（或賣3手）、十分之二（或賣2手）持股，最後賣出十分之一的持股（或賣1手），同樣都有減少風險嘅效果。

幫襯券商好過銀行

彩兒：實戰好難咁冷靜啫……

胡：我多數會加入另一條件，買嘅股要係創新高股，喺舊年大時代，我曾經用呢款投資法以100萬元本金買入港交所（00388）Call輪，期間該股試過單日大升約兩成，最終隻輪出貨賺得400萬元，算係最大注嘅一仗。

胡：三月尾我開始留意超盈國際（02111），當時至今多次來回炒，主因三月二十三日出現大成交並創出新高，另外，亦有玩楓葉教育（01317），於4.6元開始以金字塔式買入，後來喺5.2元沽清，不過，現時處於上落市，注碼一般係幾萬蚊，唔會好似上年咁勇。

Kitty：仲有乜秘技醒我哋？

胡：用呢套方法，記得唔好幫襯銀行證券服務，佢哋多數逐筆交易收定額佣金，反而部分證券行就以一個交易日每隻股份買入總額計某個百分比佣金，慳好多！

胡：財經書作家 胡李察

海龜投資法：大師發明 睇勢揸沽

Kitty：波浪理論聽得多，原來仲有海龜投資法！

金：海龜投資法係由傳奇期貨交易員Richard Dennis同William Eckhardt創立，精粹係趨勢交易，係一種跟從系統指標出入市嘅買賣股票方法，好處係做到避免受人性貪婪與恐懼嘅心理影響決定，盡量做到趨勢出現初期就入市買貨，耐心持有到趨勢改變先沽出。可用簡單版，以突破20日線（或保力加通道中軸）為入市信號，選擇成交量大、有明顯趨勢嘅股份，力求操作靈活，提高值博率。

靠N定注碼及止蝕位

投資法重點係要計算「N」值，意思係平均波動範圍（Average True Range），幫助投資者控制注碼同訂立止蝕位，需要計算得出下面三條公式最大值：

1. 當日最高位與最低位差距

2. 昨日收市價與當日最高位的差距

3. 昨日收市價與當日最低價的差距

True Range = 以上3者之中最大值

N = 14日True Range嘅平均值

彩兒：嘩，都幾深喎。

金：唔使驚，用近排嘅港交所做例子，入市信號喺今年三月十六日出現，係20日移動平均線自去年十二月十五日跌穿50日線後，首次重新升穿出確認向上趨勢。呢次升穿50日移動平均線，價位係173.8元。信號出現後，股價連續企穩2日，所以喺第2天下晝以176元買入。以上周五192.8元收市價計，已有9.54%賺幅。

金：加注規則係，價格喺上次買入價格嘅基礎上往盈利嘅方向變化0.5N，即可再增加1個單位，直到全倉4個單位，一個N即一日嘅平均上落幅度，港交所嘅N值大概係3.6元。

Kitty：叫得海龜投資法，係咪要揸極長線？

金：呢種投資法唔啱預先訂立目標價等食胡，入市後應持有，等強勁單邊升市出現。止蝕（或止賺）設喺價格反向波動0.5N處，即只有喺盈利出現倒退時，先至減少注碼，以降低帳戶持倉風險，所以都叫做止蝕不止賺嘅操盤方法。離場規則係最近10日反向突破（股價創10日最低位減持），或跌穿50日或60日平均線就要強制減持。

金：中國銀河國際環球市場部銷售總監 金曹

星座投資法：金股樓匯旨意粒星

彩兒：我知你個人投資會參考星座命理，之前仲試過避開一劫添。

潘：平時有好多客問投資運勢，尤其係舊年五至六月，特別多人問賣樓換股好唔好。其實自己有門技巧，當然成日用，個人係獅子座，吉星喺家庭宮，代表適合物業投資，以往會比較專注呢方面，不過近4年已經冇做交易。

舊年港股出現大時代，我都好滿倉，不過上年留意到五至六月獅子座面對水星逆行，水星意味波動，加上木星同金星喺舊年六月仲喺主宮，意味六月係全年嘅高峰，所以我喺六月恒指逾27,000點時將所有持股沽出獲利，賺幾多就唔講喇，呢一役，較滿意嘅係沽出○八年買入嘅港交所。

Kitty：咦，我都係獅子座o架……其實可以點樣參考星座做投資部署？

潘：坊間係有財經占星學，觀察恒星及行星等嘅周期循環，再配合股市或經濟變化去推算，金、股、樓、匯分別特別受唔同星體影響，例如土星喺家庭宮意味係專注樓市，股票就比較概括，如果吉星落喺婚姻宮等較陰柔嘅宮位，可能就適合投資女人股，例如零售股。

潘：其實參考星座做投資主要會睇星座性格及運勢。睇性格，白羊座進取、性急，所以較適合非密集、長線嘅投資，例如月供基金，閒閒哋5年嗰隻就啱；金牛座係最有規劃嘅，但常因太保守而錯失機會，所以不妨嘗試另類投資。

金牛座五月宜進取

彩兒：五月份投資運最好同最差嘅星座係乜？

潘：運勢最好嘅係金牛座，代表進取、積極嘅火星會喺主宮，加上太陽進入金牛座，代表明朗有熱力，所以五月可以進取啲，不妨考慮選同火或熱力有關嘅板塊，例如石油股；獅子座方面，由於吉星木星進入財運宮，並停留至九月，而且五月中後，火星進入主宮，宜投資或做生意，特別係自己熟悉嘅範疇會較得心應手，我已喺三月重投股市，以六位數字買入物流股、本地及內地地產股。

潘：最差就係白羊座，五月火星會喺財運宮，但喺九至十一號會有日食喺財運宮出現，容易面對大冧價，最好喺月頭進取，九號後收手；天秤座都唔多掂，金星逆行會引起混亂，容易情緒化，亂做交易，加上金星沖人緣，所以更加唔好同人夾份投資。

潘：星座專家 潘秋婷（利時神婆）

若有料報畀彩兒同Kitty或有嘢問，可電郵money.biz@on.cc

彩兒　Kitty