絲絲講場：葉氏化工聯席CEO「現身」
正值創辦45周年嘅葉氏化工（00408），一月起正式委任王旭（Nat）為聯席CEO，不過，原來計埋今日（八日）Nat加盟咗公司足足有一年，之前佢鮮有公開露面，佢尋日現身都話，葉氏化工搵佢返嚟坐鎮相當審慎。
Nat縱橫石油化工界30年，但舊年葉氏化工請佢加盟嘅過程絕唔馬虎，由人事部到見大小葉生（即創辦人兼主席葉志成，同佢弟弟兼現任聯席CEO葉子軒），整整差不多兩個幾月，最後一關仲要過埋董事會先得。計絲絲話，連Interview都要成兩個月，等成年先公開見人都唔算叫耐。
葉志成自傳戲就搞掂
另外，葉志成私人出錢開拍、邀得劉松仁做主角嘅自傳勵志電影，話咁快原來舊年十一月已煞科，依家搞緊後期製作，可望下半年喺中、港兩地上映。葉老闆份人好低調唔願上鏡，反而公司IR總監謝憶珠Wendy就粉墨登場，喺內地廠房做番自已講幾句對白。
余絲韻