絲絲講場：紅衫仔凋零剩番50人
港交所（00388）交易大堂嘅「紅衫仔」（出市代表）數目愈來愈少，係人都知，不過，絲絲最近發現，港交所冇再公布交易員數目，唔通個數跌到……
就咁嘅，港交所解釋話，自新證券交易設施啟用後，所有喺新設施進行嘅交易將由主機透過領航星中央交易網關（OCG）傳送，所以系統不能識別場內同場外交易，所以港交所二○一四年十一月開始唔再公布場內同場外交易統計。而出市員數目係附於該統計紀錄內，所以就冇再公布咁話。
風光時逾六百人
咁依家究竟仲剩番幾多「紅衫仔」呢？港交所話係大約50個。
二○一四年十月時仲有近80個「紅衫仔」，唔使一年半，數目下跌咗三成七！50人，開枱打麻雀都係得十零枱，「真‧冷清」！
話說最風光時，○○年港交所上市時，「紅衫仔」超過600個，之後逐年少啲逐年少啲，到二○一一年底得番唔夠100人，依家仲只剩50人。
話時話，交易大堂明年十月就約滿，「紅衫仔」數目係咁跌，到時交易大堂點處理？再縮細交易櫃位範圍？定係再擴大展覽廳面積？睇怕考起港交所。
余絲韻