絲絲講場：徐燦傑做拿督兼轉型
中泰金融國際首席策略總監徐燦傑（Prof. J）最近做咗大馬拿督！Prof. J同絲絲講，話其實都係因緣際會，多謝佢一位拿督朋友提名先做到，表揚佢對馬來西亞嘅貢獻咁話。
轉戰企業融資
近月Prof. J少咗喺傳媒出現，原來佢已經完全轉型，唔再講股票，轉身做Deal兄，專攻企業融資、幫公司搞上市咁。而「拿督」名銜就好似喺內地有政協身份咁，傾生意都方便啲、信心大啲。
Prof. J話，依家成日要飛去吉隆坡做分享、搞講座，佢話當地人對港股買賣好有興趣，亦有唔少公司有興趣嚟香港上市，佢自己手頭上都跟緊五、六間。
講起過江龍，絲絲諗起香港主板上市嘅富貴生命（01438），正正係馬來西亞上過市嘅當地土生土長企業。
若然再多幾條過江龍，肯定會更熱鬧。
余絲韻