近排港交所（00388）行政總裁李小加頗為惹火，無懼證監會反對，力撐第三板建議，雙方關係好似有啲緊張……絲絲不如都係講第二啲。
好多成功人士都有個啟蒙老師或師傅，又或者總有一、兩本書深深咁影響住佢哋嘅人生，原來小加總裁一樣有！
佢最近接受國際證券交易所聯會雜誌《FOCUS》訪問時，講到有一本刊物對佢嘅成長同人生定義有好大影響，就係《美國憲法》。你冇睇錯，對佢成長最大影響竟然係一本外國憲法，仲要係美國嘅。
仲記得嘛？小加總裁以前係讀法律。李小加話，自己好多年前仲喺美國哥倫比亞大學讀法律時，簡直對呢本《美國憲法》着迷。
直至今日，作為一個市場營運者、監管機構兼大型上市公司CEO，佢依然覺得可以從《美國憲法》中搵到好多寶貴見解，憲法內好多內容到今時今日仍可應用！
有好多人都話，小加總裁凡事向北望、港交所有好多政策都向內地傾斜，但對佢影響至深嘅竟然係《美國憲法》，真係估佢唔到！
余絲韻