Market Insight：玻璃股有條件轉勢

中國二月份出口大降兩成，就算計埋放農曆新年假因素，即使將一、二月合併計算，亦好難自圓其說。不過，總算近期大市氣氛轉好，驚嚇效果大為淡化，恒指昨最低見19,902點，收市跌幅收窄至148點報20,011點，主板成交金額縮減至626億元。

好多股民覺得20,000點上下高追無謂，要入市除非等待另一次大升或大跌。依家尷尬位，正是好淡爭持，難得評論亦是勢均力敵，但睇牛熊證前五大成交都係牛仔，似乎無懼美股及油價短線回吐壓力，惟牛證繼續全面負溢價，中線卻似睇淡。

機器人熱掀跟風潮

出口數據雖然驚嚇不足半日，但亦要反思中國經濟是否已經跌入深淵，靠基建投資及內部消費能否達到6.5至7%的增長目標？人仔近期扭轉跌勢，投資者放下心頭大石，但出口企業死多兩錢重；古勝聽上市公司老闆講，今年春節後再冇「招工難」情況，回廠報到率高達九成幾。中央就算覺得GDP唔再靠出口，亦要「保就業」，何況供給側改革難免大批工人下崗；去年有服務業吸納大量人手，但今年睇服務業PMI亦顯著回落，實在不敢樂觀。

班廠佬見人工貴，就想方法提高生產力；當生產力去到樽頸時，就用自動化去減省成本。今年中國最炙手可熱非機器人業務莫屬，連高銀地產（00283）大股東都話押股，以獲得信貸額度去投資私人業務包括機器人等。不過，機器人唔同搞房地產有錢就得，更唔係話做就做；之但係，可想而知今年不少上市公司將跟風轉型，不求業務脫胎換骨，只求股價炒番兩轉。

人大開幕及宣讀經濟工作報告後，兩會似乎冇乜好再憧憬，其實人大及政協均屬諮詢性質，集思廣益後再慢慢商討，近年最大成績係全面二孩政策，雖然已商議多年，但拍板速度快過預期；有見二孩之後，去年出生人數不升反跌，所以有倡議不如開放肚皮任生唔嬲，但衞計委話全面開放生育未有時間表。

去庫存宜睇實樓市

中央現時諗計去庫存及去產能，提高生育率不失為有效方法，惟前提係先要保障糧食安全，中化集團今年初斥破紀錄金額收購瑞士轉基因種子公司，相信就是為此原因。中央需要時間觀察兩孩政策反應，如果今年出生率保持平穩，估計全面開放亦為期不遠。

兩會儘管開始過氣，但資源股仍在升幅榜也文也武，只係名字已換成新時代能源（00166）、蒙古能源（00276）及中國鐵鈦（00893）等細價股。紐約期油在年初方被睇死跌至20美元，但班投行話咁快已轉軚睇50美元，現時咁啱在20至50美元的中間數；而內地商品交易所昨日再有多個品種漲停板，與其睇兩會之供給側改革，不如睇實房地產市道，畢竟房地產係建材之最大用戶。今年首季大城市住宅瘋搶，建材價格亦顯著回升。

以玻璃期貨為例，去年十一月創下760元人仔低位後，昨已升至974元人仔。浮法玻璃和建築玻璃價格低沉已久，今年翻身言之尚早，但至少首季在淡季不淡。龍頭股信義玻璃（00868）早前已發盈喜，預期去年純利增45至60%，以去年之市道實屬難得，其中提供穩定增長之汽車玻璃業務居功至偉，但勢估唔到公司隨即公布計劃分拆汽車玻璃業務於創業板上市。

信玻分拆前保強勢

將最值錢的業務分拆上主板並不為奇，但上創板則未免大材小用，而且不少股民聽見「8字頭」都怕怕。信義玻璃之前已有奇招，分拆信義光能（00968）以介紹形式上市，一毫子都冇集資，但其後年年配股，原來好戲在後頭，今次又唔知會搞邊科。

信玻二次分拆後，將只剩浮法玻璃和建築玻璃業務，與樓市關係更密不可分，亦可見大股東開始作出部署，今年初信玻頻頻回購，同時增持信義光能，派成績表後回購和增持將會解禁，估計公司會再度出手。暫時不知其分拆模式，但回購有助提高股權集中度，增持信玻則抵銷分拆後減少的經常收益。投資者待分拆後可以「要仔唔要乸」，惟分拆前為獲得分派，股價可望維持強勢。

古勝