絲絲講場：財圈賀3•8得啖笑

誤解：男女平權尚待努力

男女平權只係女人嘢？港交所（00388）員工社團女菁匯主席關蕙尋日話，係啲人「誤解」。

佢話，就係咁，所以到現時仍未能實現男女平權囉。佢話本港上市公司董事局與其他金融範疇，喺呢方面仲有好多工夫要做。

盼「她」嚟香港上市

關蕙又話，紐約交易所最近有隻上市代號叫「SHE」（她）嘅ETF，佢希望呢隻ETF都嚟到香港上市。絲絲即刻睇睇呢隻ETF有乜特別？原來呢隻ETF專投資喺啲性別與年齡高度多元化嘅公司。

好失望：女董事佔比無多過

「好失望」係，恒指成分股女董事佔比冇進步過。

話說社商賢匯出統計報告，恒指成分股中女董事比例與舊年一樣，都係11.1%。即是638位董事中，得71位係女性，連社商賢匯行政總裁魏余雪奕尋日都話「好失望」，因為好多女性表現出色，都入唔到董事局。

個別要身兼多職

但有少數「好打得」嘅女性，就身兼多間上市公司董事，連魏余雪奕話擔心部分女性Workload（工作量）過重，唔知佢哋點樣分身。好似創興銀行（01111）副主席梁高美懿咁，絲絲睇番港交所資料，佢係九間上市公司嘅董事！

始終都遲：港交所敲鑼賀節日

「遲咗」嘅係乜？就係男女平權午市敲鑼囉。

儀式遲咗一分鐘

港交所尋日應節，隆而重之為男女平權搞個午市開市敲鑼儀式。

主辦單位其中一方MSCI產品部執行董事Charlene Low可能對男女平權問題有太多感觸，致詞時「講多咗」，令敲鑼儀式遲咗一分鐘，喺一點零一分先舉行。在場各位當然唔會介意，繼續開開心心敲鑼。

不過，仍然好感觸嗰個怕且係絲絲，事關男女平權個鑼，何止遲咗一分鐘……

余絲韻