投資 U WIN：Let's Party！Talk掂做「財」子

記者在大學時曾參加過一個雞尾酒會，是主辦人Philip Leung定期舉辦的活動（Small Talks Circles），會安排各行各業重量級講者參與，跟大學生聯誼，分享仕途、人生觀及社交技巧等。這類雞尾酒會完全模仿商場的社交場合，Philip冀這些實戰經驗能提升學生的社交技巧。記者再次踏足同一場合，見盡同學在短短一晚落力偷師。

無厘頭嘢考你常識

到達會場，Philip介紹身旁的外籍學生給記者認識。她剛從語文系畢業，正努力找工作，但感前路茫茫，故前來請教Philip。Philip語重心長地說，「單單讀書叻唔夠，非學科教育係好重要，要有社會常識、世界觀，先有機會爬上去。」

錢浩然	應佑杰（Stanley）

Philip續說，與別人第一次見面打開話匣子，「無厘頭」的東西，上至天文，下至地理都可以是傾談題材，「唔好睇小呢啲無厘頭嘅嘢，其實好有用，你個『水塘』乾唔乾，人哋就係睇呢啲！」他所指的「水塘」是時事、經濟、政治、天氣及體育等應有常識。

懂「LAST」留低好印象

不論在社交場合或面試時，都要注意自己言行舉止，因個人品行及處事態度會不自覺地表現出來。曾經是兩間上市公司主席的Philip指，「我請人最緊要睇佢嘅品行同態度，其他嘢唔識可以教，但係呢兩樣就好難教。」他更稱，「見老闆前應做足功課，『Google』吓間公司做咩。」

總括而言，Philip表示，想要第一次見面就予人好印象，「LAST」的元素一個也不能少，「L代表外表端莊（Look Good），A代表態度積極（Attitude Right），S代表身體散發的香氣（Smell Great）（塗點香水較佳），T代表說話精闢（Talk Smart）。做好呢四樣，人哋先會記得你！」

同學絕招——淡定兼突出自我

區文惠（Alison）

中文大學專業會計一年級生

Alison指：「我會主動去介紹自己，行前握手，跟住同佢傾啲輕鬆啲嘅話題，避免太學術，大家都可以就住近排嘅時事，分享吓見解！」

袁永成（Gordon）

中文大學專業會計一年級生

Gordon指：「嚟之前，最好了解吓個活動內容，做啲功課，有疑問就可以到時問，唔係兩手空空咁嚟！」他笑稱：「若有冷場，可能搞吓笑，或者轉話題！」

錢浩然

香港大學經濟及金融二年級生

錢浩然指：「最緊要係表現自信，眼神要Firm，講嘢帶笑容，握手有力！一開始我會自我介紹，之後就隨心繼續講。同人傾偈最忌就係人哋問一句，你答一句，應該講多啲。可請教佢嗰行嘅嘢。」

應佑杰（Stanley）

中文大學系統工程二年級生

Stanley提到兩方面：「搵同對方嘅共同背景，咁就更容易去了解一個人同建立關係喇！」他亦指，「我會用啲特別嘢介紹自己，例如我停學去做實習，加深人哋對我嘅印象。同埋聆聽別人，全部人都好鍾意講自己啲嘢，如果知人哋返緊工，就問佢返工返成點。」

專家貼士：Say Hi 製造機會

現職金融界又點睇？新鴻基金融財富管理策略師溫傑曾當面試官，也走訪過不同的金融論壇與大學生交流，怎樣的社交方式才贏到他讚賞？他稱，「對方嘅眼神、站姿、裝束，頭10至20秒已睇完！」特別是在社交場合，第一印象不好，其後若再沒機會交談，你在別人腦海的壞形象便被定型。

被動的交往會令自己錯失很多機會！溫傑建議，「喺咩場合都好，主動打招呼好緊要，呢個係交談嘅開始！」他說，「如果係金融論壇，咁大家好可能傾到啲金融知識，如果個學生喺呢方面有嘅知識比我想像中多，我會好欣賞。」

八對方背景博好感

交談中少不免閒話家常，「若個學生一早『八卦』定，知多啲我嘅背景、專業同興趣，例如我公司已被光大証券收購，又或者知我鍾意貓，我應該會幾鍾意同他傾偈。」可見，要在社交場合有好表現，端莊外表及談吐得體是少不得，同學們真要花點工夫！