孖妹Ｓ檔案：10厘高息股？ 唔好High住

林：晉裕環球資產管理投資研究部董事　林偉雄（Andy）

曾：群益證券執行董事　曾永堅（Jaseper）

睇現金流業績揀貨

Kitty：我哋成日會睇啲股票嘅股息率高唔高，但其實係點計出嚟o架，會唔會包埋特別息？

林：股息率係股息與股價之間嘅比率，唔使擔心，計法好簡單，只需將股份全年每股派息除以股份現價，就可以得出股息率喇。

晉裕環球資產管理林偉雄表示，持續可派4厘息或以上的股份才是高息股。	群益證券曾永堅表示，揀高息股時，最緊要看公司現金流、業績及派息政策。　（何駿軒攝）	專家推介高息股

股息率 = 股份全年派息 / 現價

林：以恒生（00011）做例子，佢全年累計每股派息金額有5.7元（未包括特別息），以上星期五收市價137.9元計，股息率係4.13厘；如果計埋3元特別息入去，全年累計派息金額有8.7元，股息率就飆到上6.31厘。不過，佢過去唔興派特別息，今次主因係獲得出售資產嘅一次性收益，但因應市況又取消咗收購計劃，所以咪抽取淨現金出嚟派，可見呢3蚊可以話係「特殊性陷阱」，唔可以作為日後指標o架，過往股息率一向保持喺4厘鬆啲，呢個數先值得參考。

派息比率≠股息率

曾：股息率喺財務學嚟講，係一種快速估值嘅方法，只係反映緊歷史，唔代表將來，所以只可以用嚟參考，其實如果想準確啲嘅話，可以睇埋預期股息率，呢項數據係反映市場估計公司未來股息率嘅共識，更值得留意o架！

彩兒：一間上市公司點先可以派息？

林：一間公司有盈利時，會將部分賺到嘅錢回饋畀股東，不過，派息比率同股息率係兩樣嘢嚟，唔好搞亂，前者係講緊公司會將盈利幾大部分派畀股東，為咗公司用盈利再投資同埋利息回報間嘅平衡，基金多數會揀派息比率四至六成嘅公司。

理性分析背後原因

除咗賺到盈利要派之外，一次性出售資產嘅得益，同埋成立周年紀念等，都會有機會派特別息，例如○三年永隆（已撤銷上市地位）成立70周年，同埋合和（00054）成立35周年都有派，不過舊年滙控（00005）成立100周年就落空咗，出年係中銀香港（02388）成立100周年，市場都會期望佢派。

Kitty：派高息嘅公司係咪實係筍貨呢？

曾：當然唔係，香港係成熟、高效率嘅市場，資訊反映實況，搵到滄海遺珠機會唔大，例如有人會單純以市盈率（P/E）決定股票平貴入市，但教訓係大市上升，P/E低嘅股份走勢落後，大市跌，佢就跌得更深！揀高息股嗰陣，最緊要睇間公司有冇穩定現金流，最好搵啲業績Keep住有增長嘅，亦都要睇吓佢嘅派息政策係咪穩定，從而估計未來5至10年會唔會保持穩定派息。

再者，行業經營前景更加重要，例如內銀股咁，面對內地經濟放緩，同埋壞帳問題，未來有機會出現大規模撇帳，或者會減少派息，所以真係要做功課先得，其實一般現金流穩定嘅都係以公用股為主。不妨以免費途徑，例如喺披露易睇通告、年報，分析公司派高息背後嘅原因。

個別拋磚引玉吸水

曾：一般公司派息嘅資金主要來自本業嘅營運現金流、投資性現金流或者係融資現金流。來自第一種就當然係好啦；第二種係主要來自變賣資產得出，屬於一次性、非可預見嘅派息，其實公司喺行業周期高峰賣資產回饋股東係好事，但要多做功課先發掘到當中嘅好公司；而第三種，散戶就要特別小心，派息可能係源於公司發債、印新股等融資活動，其實當中係涉及利息成本，所以公司咁做可能另有目的，隨時係想拋磚引玉，增加股票吸引力，吸引「好息之徒」支持股價，炒高股價之後就批股吸水。

林：有部分股權集中嘅細公司，有可能係大股東等錢使，就派特別息出嚟益自己人，做自己想做嘅嘢，呢類公司派息係同盈利冇掛鈎，小心中招。投資高息股有樣嘢好緊要，股份除息後，會喺股價度反映，如果係一啲特別息，又特別係一啲平時唔係穩定派開息嘅公司，股價有機會急跌。

股價穩定勝大上落

彩兒：高息但曾經重創嘅股份值得吸納？

林：見到隻Bracell（01768）同隆成集團（01225）股息率有成200厘，好誇張，以隆成為例，佢每次除息效應都好顯著，會出現急跌，另外隻華泰瑞銀（08006）股息率150厘，但佢一係唔派息，一派又派一大舊，真係畀佢呃晒，唔知幾時先會派。雖然投資高息股主力唔係追求股價增長，但係股價穩定性真係好重要，高息唔係大晒。

曾：睇吓隻恒發洋參（00911），股息率有18.52厘，但近期曾由0.6元跌到去0.025元，股價跌成咁，仲敢掂咩？

Kitty：5號仔（滙控）股息率約8厘，睇到股友眼甘甘。

林：揀股最關鍵都係行業前景，現時係低息環境，市道唔好，公司都仲會增加派息去吸引貪高息嘅投資者，其實作用就好似定海神針咁，旨在挽留股東，令股價穩定咋。

恒生領展看高一線

彩兒：正所謂貪字得個貧，其實係咪搵啲穩定派到5至6厘嘅股份長揸，就已經應該心足呢？

林：梗係啦，其實要持續可以派4厘息或以上先叫做高息股，恒生業務平穩，派息穩定，間中送粒糖畀你，仲要唔係毒糖先筍，值得諗！至於房地產投資信託基金（REIT）領展（00823）密密出售屋邨商場，加入優質物業，例如近期投得嘅旺角工貿署大樓進行翻新收租，我睇好佢前景。

林：另外，電能實業（00006）持有580億元資金，但係同長建（01038）嘅合併方案畀股東否決咗，之前管理層有講過，若冇啱嘅併購機會，或者會將多餘嘅現金派畀股東，若然係派晒，每股可分到27.5元，所以佢突然派5至10元都唔出奇。

曾：我嘅心水係港燈（02638），佢港島區及南丫島業務嘅壟斷情況鞏固，盈利收入及營運現金流穩定，所以較啱退休人士或者長線投資者！另一隻REIT冠君產業信託（02778）主要收入來自出租旗下物業，包括花旗銀行廣場及朗豪坊辦公大樓及商場，地理位置吸引，受個人遊來港人數下滑影響較同業為低。

曾：另一較冷門之選係公路股浙江滬杭甬（00576），旗下公路處於江蘇及上海地區最發達嘅地區，受經濟周期影響較細，盈利穩定，派息比率有60%，息率達5.38厘。

若有料報畀彩兒同Kitty或有嘢問，可電郵money.biz@on.cc

Kitty　彩兒