驗樓原來可以好奇幻。香港專業驗樓學會會長詹濟南（詹Sir）尋日同絲絲分享舊年五大驗樓「奇聞」：牆角可以生出「靈芝」、天花板出現鐘乳石……感覺十足十「愛麗絲夢遊仙境」（若果層樓唔係自己嘅話）。
連詹Sir都話入行咁耐都未見過嘅，包括「奇聞異事」、「老鼠昆蟲屍體大送禮」、「你睇我唔到」、「大整蠱」同「設計上的奇則」。
當中最誇張嘅「奇聞異事」，都可算係牆角生「靈芝」。希望嗰啲真係靈芝、可以繼續種落去？諗多咗喇，嗰啲實情唔知係乜菌嚟。詹Sir話相信係拆板時拆得唔乾淨，令到啲「靈芝」可以喺殘留木材上面生長。
「奇聞異事」仲包括，天花突然有幾舊木「隊穿牆」，估計係因為落石屎嘅時候唔小心跌咗條木方入去，樓上裝修打地台時又唔小心逼咗條木落樓下；仲有係天花板竟然出現鐘乳石，十足自然奇觀。
「老鼠昆蟲屍體大送禮」唔使解，一睇明晒。
至於「大整蠱」同「你睇我唔到」系列，就包括水泥封咗水喉、外牆瓷磚徒手搣得甩，漏駁喉管唔在講。而「設計上的奇則」就包括坐唔落嘅廁所、買樓送斜台等。分分鐘奇幻過主題公園。
余絲韻