絲絲講場：財子搵伴最冧小學老師
尋日元宵，乜都雙雙對對，但就畀絲絲發現咗，佳偶未必係天成，而係份工造成！
話說，絲絲咁啱睇到份美國人口統計局資料，係二○一四年調查咗350萬個家庭所得出結果，咩工種最多揀咩工種做配偶，一眼睇晒。數據顯示，金融人搵太太，小學女教師最搶手！
啲男士無論係個人理財顧問、金融分析師、金融產品銷售代理、定保險經紀，佢哋太太大部分都係小學女教師。小學Miss嘅搶手情況，不限於金融界，連電腦程式員嘅另一半，大部分亦係小學女教師；男小學教師一樣係鍾情小學女教師！乜美國有咁多小學女教師咩？定點呢可。至於地產經紀就鍾意搵番地產經紀，經濟學家、人事顧問同公關就睇中經理。
譚朗蔚讚太太有愛心
調查仲發現，高收入女士會揀番賺錢差唔多嘅做另一半，即係醫生律師揀番醫生律師；低至中收入女士通常嫁個賺錢多啲嘅。即是？女CEO偏向嫁畀男CEO，男CEO就揀秘書囉。
咁本地金融人呢？富昌金融研究部總監譚朗蔚嘅太太，就正正係一位小學老師，佢兩位仲係小學同學添！譚朗蔚話小學時唔同女仔玩，所以同太太唔熟，不過「失散多年」後喺Gathering上重逢就開始咗，拍拖4年拉埋天窗。佢仲大讚太太好有愛心添！絲絲明晒。
而信誠證券聯席董事張智威嘅太太，以前就係一位護士。佢兩位係中學同學，中學時就已經係一對，到畢業做嘢一直冇分開，拍咗超過十年拖後結婚。仲有，呢段仲係初戀添！
余絲韻