絲絲講場：投資半契樓領嘢凶宅大王：無有怕
定啲嚟，新年流流唔係講嗰啲。伍冠流除咗出名夠膽買凶宅之外，佢亦都鍾意另類啲嘅物業投資，好似「半契樓」咁。顧名思義，即是買層樓嘅一半業權。
以低市價三成購入
點解會有一半業權賣？好多原因。好似今次呢個大坑浣沙花園單位，原本係由陳女士與同居男友一齊揸，點知男友靜雞雞將自己一半業權轉咗畀同前妻所生嘅仔，阿男友過身後，佢阿仔一○年將嗰一半業權拍賣，就畀伍冠流以低市價三成，即作價一百二十萬買咗。
一直住緊層樓嘅陳女士即刻同伍冠流打官司，話男友生前應承過，如果陳女士負責供樓同家用，佢個女可以住一世，結果高院舊年判當時已經八十三歲嘅陳女士贏，可以終身居住。
上訴套現分錢 輸埋
伍冠流尋日上訴，想話變賣層樓分番一半錢，但都係輸。仲會唔會上訴？佢話唔會啦，仲話無心機搞。絲絲聽聞，佢好似連租都收唔到，不過佢就話「十個、八個有一個輸咗好正常啫」，一於冇有怕。
余絲韻