絲絲講場：中海郝建民春茗「遊花園」
近幾年中國海外（00688）春茗，由於次次都靠近業績期，績前靜默期自然好多嘢都唔講得，面對住左一條問題，右一條問題，都幾難招架，不過主席兼CEO郝建民果然寶刀未老，席間同往年一樣「遊花園」帶過唔少尖銳問題。佢仲應承咗嚟緊公司嘅業績會上，唔會好似以前咁早走，仲會畀記者們問到夠喎！
自詡藍籌 避談銷售目標
就好似問到銷售目標咁，佢就話呢啲真係唔講得，因為一講股價就會郁，佢哋或者會畀人查。咁同場嘅記者們當然就死心不息啦，仲用咗其他上市內房嚟做例子，話恒大（03333）等等內房一月就公布喇喎，你哋都唔怕講啦。郝總最後就突然豪氣拋出一句：「所以我哋先係藍籌嘛！」此話一出，即刻引來記者熱烈掌聲，郝總果然高招！
余絲韻