絲絲講場：Bra股主席君子好「球」

嗱！咪諗多咗，絲絲講嘅係，洪主席原來係南華籃球隊班主兼領隊，仲已經帶咗隊14年添！

越南廠房料5年回本

何止籃球，足球佢亦啱，佢係利物浦超級Fans，佢連啲廠滿布利物浦標誌。佢直頭話，自己平日嘅生活好簡單，就係圍繞「維珍妮」、「南華」同「利物浦」，三樣嘢咁話。

全球經濟波動，但去年十月初上市之後，股價扶搖直上嘅「最紅Bra股」維珍妮就一於冇有怕，大擲16億擴充廠房之餘，預料越南工業園將會需要高達2.3萬名員工，佢哋仲研究緊一種最新嘅休閒胸圍產品：「Hea Bra」。

維珍妮主席洪游奕透露已投產第一間越南廠，目前約有3,500名員工，預計今年六月前將會增加至9,000名；至於第二間越南廠仲裝修緊，預料將需要6,000名員工，而成個工業園需要2.3萬名員工。

絲絲心諗，養咁多人，銀彈少啲都唔掂喎！不過洪主席話，越南每月最低工資為156美元，平過深圳喎。公司又預期，越南廠房投資額可以喺五年內回本。

研究運動秘製Hea Bra

洪主席仲話，公司會Keep住研究新產品，包括專門畀女士喺屋企嗰陣着嘅無鋼圈休閒胸圍，並賜名為「Hea Bra」。

除咗「Hea Bra」之外，公司亦會加強發展運動產品，如運動胸圍、波鞋。

余絲韻