新春首個交易日港股紅盤低開低收，但唔緊要，對上一個猴年（○四年）都係紅盤低開，但年尾輕微高收作結，今年市況都好大機會先低後高。國指唔經唔覺跌到落7,600點水平，○九年及○八年低位分別在6,404及4,792點，今年會唔會「重遊舊地」，就要睇吓中國會唔會爆發金融危機。
總之，今年都係波動年，冇咩事唔可以發生，如今未到極度恐慌的時候，大家都在等待最差的情況出現。作為投資者，可以做的是及時做好風險管理，見機行事。
A股尚在休市，其實呢兩日大戶小戶好多未歸位，下周市況始見真章。油價完成反彈後再跌，「三桶油」昨跌5至6%，看來高盛話油價會見每桶20美元真係會到，咁「三桶油」股價好可能仲有得跌，即使嚟到呢啲位潛在跌幅已相對下降，亦不宜心急撈貨！
本欄猴年推介的首隻股份招金礦業（01818），昨日逆市升近一成，收報5.08元，攞咗個頭彩。留意到Tesla（特斯拉）公布業績，去年第四季蝕3.2億美元，全年蝕8.89億美元，真係賣一架蝕一架。之不過，公司同時發盈喜，話預計今年增長將加速，或能扭虧為盈，並期望今年付運量達8萬至9萬輛新款Model S及Model X。
若然今年全球電動車業進入收成之年，則比亞迪（01211）亦可關注，皆因比亞迪話，未來三年旗下新能源車銷售目標是每年翻一番，行業銷量開始快速增加，充電等配套日漸完善，前景可予憧憬。比亞迪昨日收報34.2元，跌逾5%，維持逢低收集策略。
從事產銷充電樁的泰坦能源（02188）假期前發盈警，預計去年度會繼續錄得虧損，主要是電力直流產品涉及的市場投資規模減緩及競爭加劇，導致銷售與前年同期相比有所減少。電動汽車充電設備產品系列銷售雖有較大幅的增長，但去年加大了在電動車充電網的建設及營運項目的投資，令費用增加。
一句講晒，去年仍處投資期，今年業務是否可加快發展，不妨拭目以待。該股昨日收報1.02元，跌12.8%，低於去年十月的配股價及發行CB的行使價1.19元，且先觀望1元的承接力。
司慕渢