絲絲講場：金融開市鬥催運 財神贏晒
尋日初四金融界開市，各界擺陣催財運：港交所出動童子敲鼓、證券行大手筆派大利是、金銀貿易場派出財神滿場飛。結果邊個陣最使得？睇睇啲陣勢先。
港交所童子敲鼓招財
猴年港股第一個交易日，港交所（00388）一如往年，請咗英華小學鼓隊嚟表演，港交所行政總裁李小加同主席周松崗幾乎攬住班小鼓手影相。
即使出動到童子敲鼓，港股尋日唔單止紅盤低開，恒指盤中曾跌841點，結果收報18,545點，跌咗成742點，即是3.85%。惟有講句，希望在明天……
周松崗：3個C主導市場
不過，周松崗話紅盤低開係預期之內，事關假期時外圍市況大幅波動。佢仲提到，今年環球金融市場會由「3個C」主導，就係大宗商品（Commodity）價格下跌、匯率（Currency）變動、對中國（China）經濟疑慮；之但係，周主席話祝個市猴年好似猴咁靈活變通、香港人就好似猴咁靈巧敏捷善於應變。小加總裁亦話對香港充滿信心，事關香港「見過大世面」咁話。
所以尋日開市點，都冇影響小加總裁同周主席心情，佢哋一樣笑容滿面喺交易大堂大派利是，經紀收利是亦收得開心，個個落力大嗌「總裁！恭喜發財！」氹得小加幾咁歡欣。
話時話，今年港交所開市儀式，出席人數多咗，去年無嚟嘅財經事務及庫務局局長陳家強都有到，絲絲仲見到證監會主席唐家成添，不過唐主席可能貴人事忙，開市儀式一完就急閃。
財神爺坐鎮金貿場
尋日亦係猴年金市首個交易日，金銀業貿易場安排咗財神爺坐鎮！財神爺滿場飛同大家影相之餘，仲去埋貿易場附近商舖拜訪，連街坊都包保新一年財運亨通。
出市代表嗌得落力
「09賣出！09賣出！」猴年開市，連嗰度啲出市代表都嗌得落力過平時，七情上面，底氣十足！呢種「公開喊價」傳統黃金交易保留至今，着住紅色外套嘅出市代表會喺交易大堂內大聲嗌出報價，同埋用手勢表示金價，第一個掂到佢嘅代表就可以達成交易。絲絲睇住佢哋喊價，熱鬧到呢。
咁財神陣Work唔Work？尋日九九金收市每両報11,248元，升咗630元，升5.93%！！今次擺陣，明顯財神跑出！
致富豪派「生發」大利是
對散戶嚟講，實實在在有嘢落袋至開心。致富證券淨是尋日就準備咗大約38,000元利是，去晒20間分行派畀股友，真係生生發發。
市況波動 望先苦後甜
派利是首站係大圍分行，致富證券董事總經理李兆豐（Stephen）話「市況比較波動，希望先苦後甜，最後可以賺番。」之後大派「小黃金」糖果及利是，當中有3封係特別大利是：1封500元及2封100元。
抽中100元利是嘅伍先生話，希望係個好意頭。抽唔中大利是嘅散戶亦唔會空手而回，各人亦有一封50元利是，錯過咗尋日派大利是環節？定啲嚟，聽講佢哋預咗幾十萬元益街坊，每間分行準備咗200封利是畀散戶，大家仲有機會。
魚缸抽獎派大利是令散戶情緒幾咁高漲，可惜港股尋日始終……不過，總算令散戶大跌市照開顏。
余絲韻