絲絲講場:港交所葛卓豪低調離任

高層一向車輪轉嘅港交所(00388),前第二把交椅,即是曾任集團營運總裁嘅葛卓豪,已於去年十二月中因合約到期,低調離開港交所。

合約完結 近退休年齡

去年十二月上旬傳出港交所裁員,解散整個資料研究部門,老臣子之一資料研究部門主管夏理遜被裁。港交所會否再有第二波餘震,一直係市場好關心話題。

不過,葛卓豪今次並唔係「被辭職」,而是合約完結;葛卓豪離職嗰時,行政總裁李小加也勁識Do,為佢大搞歡送會,斷估感謝佢嘅說話都少不免。

葛卓豪以前係港交所頭幾號重要人物,佢○四年加入港交所,○七年升做營運總裁,一三年初轉任環球結算業務主管,到一四年四月就轉低調,轉任集團結算及監管事務顧問主席及合規事務總監,服務超過10年。

佢已接近港交所60歲退休年齡,好好享受人生係理所當然。

不過,港交所高層又走一個,睇嚟真係十隻手指都數不完!

余絲韻