北水頭等倉：復星孖寶耐心等機會

想知昨日有咩股被斬倉，睇主板跌幅榜便可知一二。其中一直傳遭騰訊（00700）看上的天馬影視（01326）在0.6至0.65元行咗幾個月，昨日都終於頂唔住，笨豬跳插到落0.44元，收報0.45元，跌26%，成交股數達33球。

醫藥板塊長線可取

唔只細價股，大價股一樣咁慘。就睇近月大媽積極買入的滙控（00005），真係愈接愈低，昨低位51.75元，收報51.9元，跌2.3%，14日RSI得番18，照計50元前點都有啲支持，但會唔會見番海嘯價「三條」，極端市況真係冇得估。另一隻華潤啤酒（00291）仲誇張，股價急挫14%至12.54元，跌勢似足細價股，真係一沉百踩！

悲觀氣氛充斥，信心危機乍現，可以推斷今轉環球股、匯市場震盪已進入戲肉，持貨的可能要傷心斬倉離場，再唔係就做鴕鳥冇眼睇；但持現金的，可能喜見跌市進入中後期階段，長線投資係時候留意心水實力股。

雖然內地經濟增長放緩，但在居民生活水平提升，以及醫藥產業持續改革之下，醫藥股受經濟增長放緩及國內外金融市場波動的實際影響應該不大，故今次大跌市，應該是呢個板塊的一個布置長線倉位的機會。

復星國際（00656）及復星醫藥（02196）早前因高層協助內地調查相關消息股價先行調整，但昨日股價仍雙雙創下52周低位，大市氣氛太差，股價下跌都唔需要太多理由。

不過，若然早前負面消息未對公司營運構成影響的話，現水平再跌多一成左右，應該可以吸引實力買家眼球，等復星回落至8.8元或樓下，復藥回落至15元或樓下，不妨望多兩眼。

司慕渢