絲絲講場：港交所新嘜頭Sell互通又睇又食

港交所尋日喺傳媒午餐會上公布《戰略規劃2016-2018》三年計劃之餘，同時公布換新標誌。新Logo分別由紅色同藍色兩個環組成：紅色代表內地，藍色代表香港；港交所就喺中間，將兩者結合，寓意互聯互通；亦象徵東西方連接，港交所會透過連接內地與世界其他市場，重塑全球市場格局。

宴請70中港傳媒

尋日個午餐會亦勁「互聯互通」，內地傳媒人出席唔單止，佢哋嘅人數仲首次多過香港傳媒添，中港傳媒總共有成70幾人嚟咗。

見住新Logo，絲絲即刻諗番起舊Logo，即是「藍波、紅X」嗰個。話說二○○○年三月聯交所、期交所、中央結算合併成港交所，「藍波、紅X」Logo開始上場，同年六月港交所仲上埋市添。唔經唔覺原來都已經超過15年。

望落似兩邊夾住

絲絲記得，「藍波、紅X」Logo當年一出，設計公司話藍波代表地球，紅色代表中國，成個Logo代表中國發展遍布世界。但啲人反應係「咁大個交叉？」當時港交所解釋話，嗰個係港交所英文簡稱「HKEX」個字母「X」，亦代表紅絲帶，話港交所要把世界送畀大家咁話。

絲絲再望多兩眼個新Logo，中間個互聯互通連接位，唔知點解睇落有啲似係個畀兩邊夾住嘅狹縫……可能絲絲呢排喺公司對得啲CNH（離岸人民幣）多，諗多咗。

余絲韻