絲絲講場：證券行跌市送暖 豪派9個月花紅！

雖然個股市弱過藥煲，經紀、散戶對住個市都無晒心機，但證券界近日卻傳來好消息。絲絲收到料，證券行陸續開始派花紅，個別活躍證券行喺元旦假期前剛出咗第一期花紅，平均有成3個幾月咁多；第二期花紅今年四月發放，預期仲和味，估計有5至6個月。因為一般嚟講，第一期花紅只係佔整體花紅三成幾至四成左右。

多得「大時代」收入勁

換言之，雖然舊年四月嘅港股大時代只係玩咗兩、三個月「貨仔」，但效應非同凡響，足足令部分證券行全年有望派成9個月花紅，相對舊年全年只派6個月，多好多！

難怪有經紀可以豪到話，舊年上半年賺咁多，下半年唔做都唔使憂。

不過，絲絲睇，踏入二○一六年個市，好明顯仲差過舊年下半年，成交又彈唔起，散戶都冇晒心機入市，唔知啲經紀有冇擔憂個市會再差落去？

至於其他細行，絲絲聽聞，亦會二月陸續發放花紅，預計今年最少都應該有3個月花紅，比舊年1.5個月為多，雖然唔夠活躍證券行咁多，但一樣可以過肥年！

余絲韻