絲絲講場：4成港男慳自己醒伴侶？

友邦退休基金管理及信託（AIA MPF）調查係咁講o架。調查仲發現，唔少受訪伴侶都欠缺共同理財目標，得35%人會定期同伴侶商量退休大計。遇着伴侶揮霍無度勁Fing錢，原來得四成人會同對方坐低傾解決方法。

75%港女有儲私己

而香港男士仲似乎傾向採取繼續縱容嘅策略，超過四成受訪男士話會自己慳啲使，寧願儲多啲畀對方用（真係？絲絲幾咁想問句受訪者位伴侶）；相反，高達75%受訪女士就會儲起私己錢自己用，實行「你嘅錢即係我嘅錢，我嘅錢即係私己錢。」

要四百萬先夠退休

雖然港男睇嚟好偉大，不過AIA MPF行政總裁馮裕祺（Stephen）就話，慳嚟畀另一半使都係No Good，應該係要慳嚟畀第時退休用先重要。

「今次受訪者嘅平均理想退休年齡係61.1歲，而理想退休儲備金額中位數就有成403萬元。」Stephen話，有67%受訪者嘅退休儲備都不足應付自己嘅理想退休生活，只有1/3人可以儲夠錢無憂咁退休。

點先算「中產」？受訪者大多數認為月入5萬以上算係「中產」。唔好以為「中產」就少啲問題，調查見到，中產人士都有4成人儲備不足。Stephen相信，可能係因為「中產」退休目標太高，仲有就係「搵得多、使更多」，未能好好落實計劃。

絲絲一向仲以為，兩個人係得埋一齊，錢會兩份儲、將來由兩份一齊建立……乜原來係大、迷、信！

余絲韻