絲絲講場：星級父母11大秘方

1 畀仔女做家務

哈佛研究話，仔女唔識洗碗，培養唔到獨立處事能力。家長們應該畀仔女「捱苦」，倒垃圾、洗衫留畀佢哋做啦！

2 教授社交技巧

賓夕凡尼亞州州立大學有份追蹤美國超過700個細路，睇住佢哋由幼稚園至25歲嘅成長歷程，發現有良好社交技巧嘅細路比較容易攞到大學學位同搵到Full-Time Job。

蓋茨（右）創業多得父親（左）人際網相助。	朱克伯格（左）初為人父，已有滿腹大計如何培育囡囡。	譚朗蔚不時帶囝囝Kayton去戶外玩。

3 期望會高啲啲

加州大學分析咗6,600個喺○一年出生BB嘅資料，發現父母期望愈高，仔女愈有成就。

4 兩公婆關係好

唔講都知父母成日「嘈交」會影響仔女成長，離婚嘅話，會好大程度影響仔女對事物嘅判斷。

5 高學歷關連大

有研究追蹤超過14,000名由九八年至○七年入讀幼稚園細路，發現阿媽18歲或以下，即係阿媽本身都未讀完高中，仔女大個讀到高中或大學嘅機會都低啲。有研究仲話，細路8歲嗰陣，單憑父母當時教育程度，就預測到呢個人40年後嘅教育水平同工作成就。

6 從細學好數學

愈早掌握數學愈着數，因為數學愈叻，對閱讀愈有幫助。

7 強調後天努力

要灌輸類似「人定勝天」嘅概念，即係話仔女測驗高分，千祈唔好讚係「天生嘅」，因為咁樣等如同仔女講「後天做咩都無用」。

8 切勿傳導壓力

千祈唔好以為陪得仔女時間愈多，仔女會愈叻、愈乖、愈覺得幸福；尤其係阿媽自己都忙到死嘅時候，仲想辦法搵時間倍仔女，呢種壓力會好似傷風咁傳染畀仔女。

9 良好親子關係

父母有錢當然好，但調查話嚟自貧困家庭嘅細路只要喺0至3歲得到父母悉心照顧，細個讀書都會叻啲。

10 阿媽出嚟做嘢

哈佛大學商學院研究發現阿媽外出工作嘅細路女，大個咗比同齡女仔更有機會成為管理層，仲會賺多23%嘅錢！點解？畀阿媽薰陶囉！

11 社會地位高啲

貧窮唔多唔少限制細路嘅潛能，史丹福大學研究○一年出生嘅BB，發現高收入與低收入家庭嘅細路，佢哋嘅成就差距，愈嚟愈大，差距比起25年前大咗30至40%。

國際財金猛人會點做

巴菲特：教授金融知識

股神巴菲特有三個仔女，依家佢哋都50幾，60歲。想當年，股神又點樣傳授自己嘅投資心得畀自己嘅仔女？巴菲特覺得，小朋友8到10歲就要知金融係點運作，要點樣喺商場上打好關係。佢話，呢啲技能係會畢生受用，不但對佢哋將來嘅生意有幫助，而且個人嘅快樂指數會高啲！

老蓋茨 請朋友助創業

有錢人點幫仔女鋪路最好？微軟創辦人、全球首富蓋茨嘅爹哋、媽咪就好聰明，佢留畀蓋茨嘅係自己嘅社交網絡。年輕蓋茨創立公司嗰陣，佢爹哋媽咪幫佢搵咗相熟嘅資深老前輩入公司做。有世叔伯照住，當然更易成功喇！

朱克伯格 提供健康童年

剛剛初為人父的Facebook行政總裁朱克伯格喜獲千金的嘅喜悅心情家陣仍未平復，但朱仔與太太已即時寫了封公開信畀囡囡Max。朱仔打算怎樣培育囡囡Max，佢就話最重要係要給子女一個健康嘅童年，這樣子女未來才能發揮全部嘅潛力。

港財圈名人心得

譚朗蔚 抽空多講古仔

富昌金融研究部總監譚朗蔚（Stevan）有個2歲半嘅仔仔Kayton，Stevan平時都放假都會約埋仔仔嘅同學同佢哋爸爸媽媽一齊去郊外玩，教佢同朋友分享玩具，同埋畀佢哋相處吓，學埋社交技巧。Stevan話仔仔對好多事都好好奇，會不停問問題，所以佢對仔仔嘅期望都幾高（口架）。同埋Stevan話仔仔最鍾意聽古仔，所以Stevan都抽時間講多啲古仔，等仔仔知多啲嘢。

郭家耀鼓勵遊樂中學習

中國銀盛財富管理首席策略師郭家耀（Matthew）都有個2歲幾嘅「小情人」Sugar，Matthew深明小朋友鍾意大人信任，從而建立自信心，所以平時都叫Sugar幫手做少少家務，亦可以令佢有責任心。佢又鼓勵囡囡多啲玩，覺得有一個快樂嘅童年緊要啲，反而覺得學術就唔急住要學，亦唔介意發展比人慢，會多啲畀機會佢從遊戲中學習，輕輕鬆鬆冇乜壓力就唔會怕咗學習。

余絲韻