期指觀瀾:炒友短線轉戰國期

美股隔晚反彈,但恒指昨早仍低開94點,本來中段有逾百點升幅,但尾段又掉頭向下,結果恒指收報21,274點,跌35點締九連跌,主板成交671億元。今日為美國議息結果前夕,睇怕大家繼續唔做唔錯!

即月期指日市高水57點收場,報21,331點,未平倉合約10.9萬張。不過,國期才是主戰場,國期日市收9,392點,高水48點,未平倉合約總數突破30萬張。呢期垃圾債爆煲,商品、匯市起暗湧,一旦美股有咩冬瓜豆腐,新興市場如紙般薄弱,中國市場將成主震央。現貨雖靜,但期市有得賭單邊,炒家樂此不疲趕下注。

近日多次提及,恒指向下另一城池在20,939至21,130點。若議息結果公布後此關失守,向下支持區在20,300至20,500點區域。市況交投薄弱下,短線極端波動插穿主要支持區亦不足奇,但呢啲快閃場面布置倉位機會一瞬即逝,想捕捉機會嚟緊兩日就冇得偷懶,金精火眼盯實個市!

John Mullen