絲絲講場：財圈扮嘢 爭做Superhero
今年嘅聖誕節就快到，但竟然令到全中環嘅蝙蝠俠、超人、神奇女俠同美國隊長等造型同服飾突然缺晒貨，點解嘅，又唔係萬聖節喎？原來今年港交所（00388）同幾間外資行及基金公司，都不約而同以「Superhero」（超級英雄）做周年晚會主題，咪搞到啲造型衣着斷晒貨咯，真係有冇咁橋呀？
港交所晚宴超強主題
好似近期受裁員消息影響嘅港交所，今個星期四（十七號）將會舉行年度壓軸重頭戲嘅周年晚宴盛會。雖然周年晚宴年年都有特定主題，今年都算玩嘢，揀咗超級英雄做主題，個個要化身成英雄漫畫人物，行政總裁李小加一向係玩得之人，佢今年究竟會扮蝙蝠俠、超人、定係變形俠醫，絲絲就估小加可能會扮Iron Man嘞！主席周松崗又會扮邊位英雄，睇怕大家真係要到時至知。
港交所當日會搞個最佳服飾及造型比賽，鼓勵員工盡情參與，不過講真，Superhero嘅角色真係一啲都唔易CARRY。相反，以往晚宴嘅主題就易搞得多，好似曾玩過懷舊Feel，個個着晒唐裝衫；又玩過牛仔Look！
余絲韻