期指觀瀾:關鍵時刻觀望為上

美股上周五食瀉藥,昨日恒指低開四百點後,曾低見21,010點,惟午後A股止跌回升,恒指乘勢收窄跌幅,埋單報21,309點,跌154點,經已是八連跌,主板成交774億元。

本來筆者在觀望20,939至21,130點區域能否守住,誰知話咁快昨日便一度推落21,130點樓下。雖然即市和收市均未有失守21,000點,但必須提防議息前後,橫跨商品、匯市、股市仍有機會先來一次集體洗白白,之後才出現較大型的冚倉潮,故現階段短線操作好淡都兩難。

期指日市收21,310點,幾乎平水,顯見好友唔爭在等多陣,淡友亦唔傾向呢一刻加倉。議息過後,本月已過一半,唔少基金大戶經已放假過聖誕。如果議息後沒有出現跨市場洗白白場面,月底前市況可能會繼續沉靜,但恒指本月至今波幅又似乎未夠班炒家胃口,睇昨日A股尾市發圍,呢鋪又會唔會係阿爺打救,不妨等着瞧!

John Mullen