絲絲講場:曾建中減肥上癮想開埋班

Madhead創辦人曾建中(Terry)除咗整game勁之外,原來減肥都好有心得!事關Terry近期做運動減肥,比起高峰時期瘦咗足足廿磅!原來佢同同事開個WhatsApp Group,一齊做運動減肥,減到有獎,減唔到要罰錢,遲啲仲想搞啲運動班畀班同事添!

谷同事運動

咁Terry有咩減肥心得?「食嘢唔定時同太夜食會好易肥,我自己都戒咗,同埋一定要做運動,因為運動係會上癮(口架)!」

上癮嘅Terry真係瓣瓣都啱,不論跑步、打波、做GYM都有玩,最近仲諗住玩埋Yoga:「嚟緊仲想搞埋瑜伽班,等啲女同事都可以做下運動嘛。」唔……Yoga?睇嚟絲絲都係時候要參考吓,同Terry班Staff一齊運動吓喇!Terry仲話以前讀書嗰陣仲有玩毅行者添,不過佢話第二日攰到飛起,之後就轉做贊助者喇。

計我話,與其好似之前咁搵「女神」陳妍希同南韓天團BIGBANG做代言人,不如搵Terry自己代言啦!諗起之前陳妍希個電視廣告,同埋成個銅鑼灣地鐵站都係BIGBANG crossover《神魔之塔》,價錢應該相當「乸脷」,不過一問佢究竟請G-Dragon同太陽佢哋使唔使天價?佢就話係商業機密唔講得。但Terry就透露,好快就會有一個唔細嘅代言活動,至於搵咩人嚟代言?咁就要等正式公布嘞。

余絲韻