絲絲講場:富爸媽教仔女由細講錢

富爸媽做嘅嘢,同一般人有乜唔同?有三樣:富爸媽會不斷自學、較少緬懷過去、奉行利己。美國有位白手興家嘅富豪西博(Steve Siebold)訪問咗超過1,200位全地球至有錢嘅富豪,得出以上結論,佢仲將研究所得出咗本書《How Rich People Think》。

佢發現,富爸媽教仔教女,亦有富爸媽嘅一套。想睇吓自己係咪做富爸媽嘅質地?先問心嗰句,有冇講過「錢係萬惡之首」、「知足者,貧亦樂」、或「貪字得個貧」先?嗱嗱嗱,就係咁,細細個入晒腦,對錢仲點會有好印象!口講話想有錢,潛意識就見錢怕怕。平凡大眾教仔要安穩舒適就夠,話小心錢係萬惡係霸權,咁自然世世代代都只能做平凡大眾繼續「貧亦樂」。

富爸媽就有另一套,甚麼良好理財習慣?點止。佢哋自細就同仔女講「想有錢好OK」同埋「做人要大膽無有怕兼要Think Big(有大志睇闊啲)」,仲會教仔女錢係佢哋至好朋友,可以幫自己同埋好多人解決問題同改善生活。教曉仔女自細正面咁睇錢,錢先會埋仔女身。

余絲韻