絲絲講場：如果有110歲命投資咩好？

花旗呢個月出咗個報告，全球藝術品拍賣額舊年有成161億美元（即大概1,255億港元），由千禧年起至舊年，平均每年增長13%，勁過同期全球GDP年增長（3.5%）同出口年增長（8.1%）。

走勢同經濟直接掛鈎

份報告比較咗一九○○年至大前年，即是近110年來股票、葡萄酒、郵票、藝術品、債券同票據嘅價值走勢（睇上圖），發現由一戰開始，藝術品價值走勢同經濟直接掛鈎，好似七三年石油危機、九○年代初、同○八年金融風暴時，兩者表現都係齊齊孖住。

藝術品跑贏債券票據

唔只咁，拉長110年嚟睇，就會見得到，藝術品價值整體跑贏債券同票據，但就輸畀股市。

收藏藝術品除咗可以晒身家、品味之外，仲係保值嘅投資。所以話，搞藝術搵唔搵到食，唔敢講；買藝術品，就分分鐘幾代都有得食。話時話，冇人搞藝術，又點有得買呢可？

余絲韻