絲絲講場：新股騎呢名考起你

周黑鴨「怪味」起家

齋睇公司名，你都未必估到佢哋做咩生意。「扯旗山」其實係喺上海搞港式茶餐廳，仲搵埋周中師傅做非執行董事嗰間；「避風塘」亦係喺內地搞食肆，主打港式點心同小菜。

「周黑鴨」一樣食得，絲絲叫老頂估間公司做咩生意，佢即話「創辦人姓周囉、賣鴨、黑色估係滷水啩」，中晒。佢哋係做鴨鵝類熟滷製品加工，創辦人周富裕喺九七年湖北集貿市場開設「周記怪味鴨」專賣店，○四年改名做「周記黑鴨」，仲註冊埋個品牌名「周黑鴨」。話時話，隻鴨喺內地有成幾百間直營店，老頂咁快答中，唔通佢早就食過？

至於另一間「我訂花」，個名就直接到你唔信，佢哋係內地大型網上鮮花銷售商，佢哋嘅自營網上平台除咗「我訂花」外，仲有一個叫「531314」。「531314」係咩？即係「我想一生一世」咁解。唔明？內地公司梗係講普通話啦。

近排搞緊上市嘅公司，亦有唔少係你熟口熟面嘅，好似搞補習生意嘅遵理、經營「DR REBORN」嘅醫思醫療集團，同埋喺香港有好多間醫務中心嘅盈健醫療咁，熱鬧到呢。

避風塘我訂花夠突出

公司名夠突出，係咪招股易啲突圍呢可？香港上市商會總幹事黃明偉話，「避風塘」、「我訂花」呢啲用番營運緊嘅品牌名，可加深投資者印象，都合理。但佢話唔好「玩太大」，個名太抽象，會有疏離感，仲會降低投資者興趣。

香港股票分析師協會主席鄧聲興就話，個名突出，可吸到投資者眼球，好似佢見「扯旗山」個名，雖然未必會推介，但都會留意吓間公司做咩業務。

話時話，絲絲個名……

余絲韻